Jizzaxda MIB orqali ot egasiga olib berildi
Maʼlum bo‘lishicha, fuqaro qo‘rasidan chiqib ketib qolgan otini o‘ziga qaytarish uchun sudga murojaat qilgan va MIB orqali ijro taʼminlangan.
Majburiy ijro byurosi organlari ish yurituviga baʼzan qiziqarli ijro ishlari ham kelib turishi mumkin. Biroq, qaror bor ekan u qanday bo‘lmasin va qay tarzda ijro etilishidan qatʼiy nazar bajarilishi kerak, albatta.
Inson va jonivor o‘rtasidagi mehrni so‘z bilan to‘liq ifodalash qiyin.
Jumladan, fuqaro F.N.ga tegishli “To‘ri” laqabli ot qo‘radan chiqib ketib, Forish tumani hududidagi o‘rmon xo‘jaligi tomonga kirib qolgan. Holat aniqlangach, jonivor xavfsizligini taʼminlash maqsadida o‘rmon xo‘jaligi xodimlari tomonidan vaqtincha saqlovga olingan.
Shundan so‘ng otning egasi qonuniy tartibda sudga murojaat qildi. Sud qarori asosida Majburiy ijro byurosining Forish tuman bo‘limiga “To‘ri”ni o‘z egasiga olib berish haqida ijro hujjati kelib tushgan.
Olib borilgan ijro harakatlari davomida “To‘ri” laqabli ot egasi F.N.ga topshirildi va ijro hujjatining ijrosi to‘liq taʼminlandi.
Aytishlaricha, ot egasini ko‘rgan zahotiyoq unga intilgan va o‘zini tinchlantirgan.
