O‘zbekiston tarixida ilk bor Milliy investitsiya jamg‘armasi London fond birjasiga chiqadi
18-may kuni London fond birjasida O‘zbekiston Milliy investitsiya jamg‘armasi aksiyalarining IPO jarayoniga bag‘ishlangan rasmiy marosim bo‘lib o‘tadi.
Joriy yil 18-may kuni London fond birjasida O‘zbekiston Respublikasi Milliy investitsiya jamg‘armasi aksiyalarining birlamchi ommaviy joylashtirilishi (IPO) jarayoniga bag‘ishlangan rasmiy marosim bo‘lib o‘tadi.
Mazkur voqea O‘zbekiston kapital bozori tarixidagi muhim bosqichlardan biri bo‘lib, mamlakat iqtisodiyotini xalqaro moliya maydoniga integratsiya qilish yo‘lidagi navbatdagi yirik qadam sifatida baholanmoqda.
Milliy investitsiya jamg‘armasining London fond birjasiga chiqishi Prezident Shavkat Mirziyoyev tashabbusi bilan amalga oshirilayotgan keng ko‘lamli iqtisodiy islohotlar, investitsiyaviy muhitni yaxshilash, ochiqlik va shaffoflik tamoyillarini mustahkamlash borasidagi siyosatning amaliy natijasi hisoblanadi.
Kutilayotgan IPO mamlakatning jahon moliya bozorlaridagi ishtirokini kengaytirish, xorijiy investitsiyalar oqimini oshirish hamda korporativ boshqaruvning zamonaviy standartlarini joriy etishga xizmat qiladi. Shu bilan birga, mazkur jarayon xalqaro investorlarning O‘zbekistonda olib borilayotgan tarkibiy islohotlarga bo‘lgan ishonchi ortib borayotganini ham namoyon etadi.
Rasmiy marosimda Prezidenti Administratsiyasi rahbari Saida Mirziyoyeva, Prezidentning iqtisodiy siyosat bo‘yicha maslahatchisi Obid Hakimov hamda boshqa rasmiylar ishtirok etishi kutilmoqda.
Tadbir yakunlari yuzasidan qo‘shimcha ma’lumot taqdim etiladi.
