O‘zbekistonda “probeg”ni o‘zgartirib sotganlik uchun ma'muriy javobgarlik kuchaytiriladi
Senat maʼmuriy javobgarlik tizimini takomillashtirishga oid qonunni maʼqulladi.
Oliy Majlis Senatining navbatdagi yalpi majlisida “O‘zbekiston Respublikasining Maʼmuriy javobgarlik to‘g‘risidagi kodeksiga qo‘shimcha va o‘zgartirishlar kiritish haqida”gi qonun muhokama qilinib, senatorlar tomonidan maʼqullandi.
Qonun bilan Maʼmuriy javobgarlik to‘g‘risidagi kodeksga bir qator prinsipial o‘zgartirish va qo‘shimchalar kiritilmoqda.
Xususan, ikkilamchi avtomobil bozorida uchrayotgan firibgarlik holatlarining oldini olish maqsadida kodeks yangi 178²-modda bilan to‘ldirilmoqda. Unga ko‘ra, avtotransport vositasining bosib o‘tgan masofasini ko‘rsatuvchi odometr qurilmasi ko‘rsatkichlari o‘zgartirilgani yoki almashtirilgani haqida xaridorni xabardor qilmaganlik uchun alohida maʼmuriy javobgarlik belgilanadi.
Qayd etilishicha, ushbu norma isteʼmolchilarning tovar haqida to‘liq va haqqoniy maʼlumot olish huquqini ta'minlash hamda avtomobil bozoridagi nohalol amaliyotlarga chek qo‘yishga xizmat qiladi.
Bundan tashqari, transport vositasini boshqarish yoki ov qilish huquqidan mahrum qilish muddatini qisqartirish tartibi ham takomillashtirilmoqda. Endilikda bu masala faqat sud tomonidan, aniq belgilangan mezonlar asosida ko‘rib chiqiladi.
Qonunga ko‘ra, agar shaxs ilgari ushbu imtiyozdan foydalangan bo‘lsa yoki jazo muddati davomida qayta huquqbuzarlik sodir etsa, unga nisbatan bunday yengillik qo‘llanilmaydi.
