Pokiston Eron urushi fonida Saudiya Arabistoniga minglab askar va qiruvchi samolyotlar yubordi

Pokistonon Saudiya Arabistoniga 8 ming nafar harbiy xizmatchi, qiruvchi samolyotlar eskadrilyasi hamda havo mudofaasi tizimini joylashtirdi. Bu haqda Reuters agentligi xavfsizlik va hukumatdagi manbalarga tayanib xabar berdi.

 

Ma’lumotlarga ko‘ra, kuchlar o‘tgan yili imzolangan o‘zaro mudofaa bitimi doirasida yuborilgan. Manbalar joylashtirilgan harbiylar jangovar salohiyatga ega ekanini va Saudiya Arabistoni hujumga uchragan taqdirda qirollik armiyasini qo‘llab-quvvatlash uchun mo‘ljallanganini bildirgan.

 

Reuters yozishicha, Pokiston aprel boshida Saudiya Arabistoniga asosan Xitoy bilan hamkorlikda ishlab chiqarilgan JF-17 qiruvchi samolyotlaridan iborat taxminan 16 ta samolyotni yuborgan. Shuningdek, ikki eskadrilya dron va Xitoyning HQ-9 havo mudofaasi tizimi ham jo‘natilgani aytilmoqda.

 

Manbalarga ko‘ra, yuborilgan texnika pokistonlik harbiylar tomonidan boshqariladi, xarajatlarni esa Saudiya Arabistoni qoplaydi. Bundan tashqari, zarurat tug‘ilganda qo‘shimcha kuch yuborish majburiyati ham mavjud.

 

Xabarda qayd etilishicha, Saudiya hududida avvalgi bitimlar asosida jangovar vazifalarni bajaruvchi minglab pokistonlik harbiylar allaqachon joylashtirilgan. Maxfiy mudofaa bitimi esa qirollik chegaralarini himoya qilish uchun 80 ming nafargacha Pokiston harbiysini yuborish imkonini beradi.

 

Pokiston armiyasi, mamlakat tashqi ishlar vazirligi va Saudiya Arabistoni rasmiylari Reuters so‘rovlariga javob bermagan.

 

Reuters’ga ko‘ra, Pokiston Eron bilan mojaro fonida bir vaqtning o‘zida vositachi rolini ham bajarmoqda. Islomobod AQSH va Eron o‘rtasidagi sulhga erishilishida ishtirok etgan hamda ikki tomon o‘rtasidagi tinchlik muzokaralariga mezbonlik qilgan.