O‘zbek-Qirg‘iz chegarasidagi mojaro hal qilindi
Ijtimoiy tarmoqlarda Rishton–So‘x yo‘nalishida, Qirg‘izistonning “Qaypas” chegara o‘tkazish punktida yuz bergan holat aks etgan video tarqaldi. Unda O‘zbekiston fuqarosi bilan qirg‘iz chegarachilari o‘rtasida tortishuv yuzaga kelgani ko‘rinadi.
So‘nggi kunlarda ijtimoiy tarmoqlarda Rishton–So‘x yo‘nalishidagi chegara-nazorat hududida sodir bo‘lgan holat aks etgan videolavhalar keng muhokamalarga sabab bo‘lmoqda.
So'x tuman hokimligi ma'lumotlariga ko‘ra, mazkur holat Qirg‘izistonning “Qaypas” chegara o‘tkazish punktida yuz bergan bo‘lib, hozirda vaziyat to‘liq nazoratga olingan hamda tegishli idoralar hamkorligida har tomonlama o'rganilmoqda.
Dastlabki ma'lumotlarga ko'ra, Qirg‘iziston chegara xizmati xodimlari hamda So‘x tumanida yashovchi O‘zbekiston fuqarosi o‘rtasida tushunmovchilik kelib chiqqan.
Tezkor tarzda ko‘rilgan choralar natijasida fuqaro xavfsiz ravishda O‘zbekiston hududiga olib kelingan.
Shuningdek, ikki tomon mas’ullari hamda fuqaro ishtirokida muloqot o‘tkazilib, yuzaga kelgan vaziyat tinch yo‘l bilan hal etilgani ma'lum qilingan. Tomonlar o‘rtasida o‘zaro tushunmovchilik yuzasidan uzr so‘ralgani ham qayd etilgan.
Rasmiylar ayrim ijtimoiy tarmoqlarda mazkur holat bo'yicha tasdiqlanmagan, bir yoqlama va hissiyotga berilgan xabarlar tarqatilayotganiga eʼtibor qaratdi. Shu munosabat bilan fuqarolardan tekshirilmagan maʼlumotlarga ishonmaslik, vaziyatga xolis va vazmin yondashish so‘ralmoqda.
Mas’ul idoralar tomonidan ta’kidlanishicha, O'zbekiston har bir fuqarosining huquq va qonuniy manfaatlari davlat tomonidan ishonchli himoya qilinadi. Bu kabi holatlar vakolatli idoralar tomonidan doimiy nazoratda bo‘ladi.
