Saida Mirziyoyeva London fond birjasi bosh ijrochi direktori bilan uchrashdi
Uchrashuvda o‘zbek kompaniyalarini global bozorlarda faoliyat yuritishga tayyorlash masalalari ham muhokama qilindi.
Saida Mirziyoyeva London fond birjasi bosh ijrochi direktori Julia Enn Xoggett bilan uchrashuv o‘tkazdi.
Ma’lum qilinishicha, uchrashuv davomida O‘zbekiston Milliy investitsiya jamg‘armasining London fond birjasi platformasiga muvaffaqiyatli chiqishi, shuningdek barqaror moliyalashtirish, ESG standartlari, “yashil” obligatsiyalar va o‘zbek kompaniyalarini global bozorlarda faoliyat yuritishga tayyorlash masalalari muhokama qilingan.
Saida Mirziyoyevaning qayd etishicha, Juliya Xoggett O‘zbekiston Milliy investitsiya jamg‘armasining IPOsi London fond birjasidagi so‘nggi besh yildagi eng yirik joylashtiruvlardan biri bo‘lganini ta’kidlagan.
Xoggetga ko‘ra, mazkur natija xalqaro investorlarning O‘zbekistonda amalga oshirilayotgan islohotlarga bo‘lgan ishonchi ortib borayotganini ko‘rsatadi.
