“Odamlar haftalab sarson bo‘lmoqda”: Senator bankomatlar bilan bog‘liq muammoga to‘xtaldi
2025 yilda O‘zbekiston bo‘ylab bankomatlardan pul yechish jarayonida 290 ming holatda turli nosozliklar qayd etilgan.
Senatning Mudofaa va xavfsizlik masalalari qo‘mitasi masalalari qo‘mitasi raisi Qutbiddin Burxonov bankomatlar bilan bog‘liq texnik muammolar fuqarolar orasida jiddiy norozilik uyg‘otayotganini bildirdi.
Senatorga ko‘ra, ayrim bankomatlarda mijoz hisobidan mablag‘ yechilgan bo‘lsa-da, naqd pul berilmasligi yoki karta qurilmada qolib ketishi holatlari yuzaga kelmoqda. Ularning muammolarini hal etadigan tezkor mexanizmlar esa amalda joriy etilmagan. Bu bo‘yicha nafaqat banklarga, balki ichki ishlar bo‘limlariga ham ko‘plab murojaatlar kelib tushayotgani qayd etildi.
“Eng yomoni, minglab odamlar bankomatlardan pul yechib olishdagi texnik kamchiliklar sababli haftalab sarson bo‘lishmoqda”, dedi Senator.
Andijonda saylovchilar murojaatlari asosida o‘tkazilgan qisqa muddatli o‘rganishlar ham ushbu muammolar mavjudligini tasdiqlagan. Keyingi tahlillar esa muammoning ko‘lami ancha keng ekanini ko‘rsatgan.
Ma’lumotlarga ko‘ra, 2025 yilda mamlakat bo‘ylab bankomatlardan pul yechish jarayonida 290 ming holatda turli nosozliklar qayd etilgan.
Shu holatlarning mingdan ortig‘i bo‘yicha fuqarolar tezkor yordam so‘rab murojaat qilgan bo‘lsa-da, ularni hal etish uchun zarur servis mexanizmlar hali to‘liq yo‘lga qo‘yilmagan.
Shuningdek, murojaatlarning ko‘rib chiqilish muddatlari ham turlicha bo‘lib, 290 ming murojaatdan 97 ming tasi 2–3 ish kunida, 22 ming tasi 4–6 ish kunida, 9700 tasi 7–15 ish kunida hal etilgan. Qariyb 10 ming holatda esa murojaatlar 15 kundan ortiq vaqt davomida ko‘rib chiqilgan.
