O‘zbekistonlik tadbirkorning Ozarbayjonda 80 ming dollarni undirish masalasi TIV tomonidan ko‘rib chiqilmoqda
Tadbirkor sud qaroriga qaramay, hamkor kompaniyadan mablag‘ni ikki yildan beri undira olmayotgani bildirilgan.
O‘zbekistonlik tadbirkorning Ozarbayjon kompaniyasi bilan bog‘liq 80 ming AQSh dollari miqdoridagi mablag‘ni undirish masalasi Tashqi ishlar vazirligi tomonidan nazoratga olindi. Bu haqda vazirlik matbuot xizmati ma’lum qildi.
Ma’lum qilinishicha, mazkur holat Savdo-sanoat palatasi tomonidan tashkil etilgan ochiq muloqot davomida ko‘tarilgan. Unda tadbirkor Ozarbayjondagi hamkor kompaniya tomonidan to‘lov ikki yildan buyon amalga oshirilmayotganini, sud qarori mavjud bo‘lsa-da, mablag‘ni undirish imkoni bo‘lmayotganini bildirgan.
Shuningdek, tadbirkor ilgari shunga o‘xshash holatlarda xorijiy kompaniyalar O‘zbekistondan qarz mablag‘larini undirishda Tashqi ishlar vazirligi aralashuvi natijasida masalalar hal etilganini ham qayd etgan.
Uning so‘zlariga ko‘ra, elchixonaga ham murojaat qilingan, biroq hozirga qadar mablag‘ni undirish bo‘yicha natija qayd etilmagan.
Tashqi ishlar vazirligi munosabatida bildirilishicha, O‘zbekistonning Ozarbayjondagi elchixonasi ushbu masala yuzasidan tadbirkor bilan doimiy aloqada bo‘lib, murojaatning dastlabki bosqichlaridan boshlab konsullik-huquqiy ko‘mak ko‘rsatib kelmoqda.
Qayd etilishicha, jarayon davomida tadbirkor va uning huquqiy vakili o‘rtasidagi ayrim tashkiliy masalalar sababli ish yuritishda uzilishlar yuzaga kelgan.
Ayni paytda elchixona tomonidan mazkur masalani qonuniy doirada hal etish yuzasidan tegishli ishlar davom ettirilmoqda.
Eslatib o‘tamiz, avvalroq Savdo-sanoat palatasidagi uchrashuvda bir tadbirkor Ozarbayjonga eksport qilgan mahsuloti uchun to‘lovni ololmayotganini aytgan va O‘zbekiston diplomatlarining xorijdagi biznes manfaatlarini himoya qilish darajasi haqida savol ko'tarilgan edi.
