Prezident faoliyatiga bag‘ishlangan “Yurt qayg‘usida 365 kun” kitobi taqdimoti bo‘lib o‘tdi
Nashr 2025-yil davomida amalga oshirilgan voqealarni xronologik tartibda aks ettiradi.
Kontent tayyorlash markazida “Yurt qayg‘usida 365 kun” kitobining taqdimoti bo‘lib o‘tdi.
Tadbirda mamlakatning ijodkor ziyolilari, jamoat arboblari, keng jamoatchilik vakillari hamda ommaviy axborot vositalari xodimlari ishtirok etdi.
Mazkur nashr Shavkat Mirziyoyevning 2025-yil davomida davlat boshqaruvi, xalqaro diplomatiya, iqtisodiy islohotlar, ijtimoiy himoya, ekologiya, ta’lim va madaniyat sohalaridagi faoliyatini hujjatli manbalar, tahliliy sharhlar hamda fotolavhalar asosida jamlagan keng qamrovli to‘plam hisoblanadi.
Kitobda O‘zbekistonda amalga oshirilayotgan islohotlarning tarixiy ko‘lami, davlat boshqaruvidagi yangi yondashuvlar hamda “inson qadri” tamoyiliga asoslangan taraqqiyot modeli o‘z ifodasini topgan.
Nashrda iqtisodiy o‘sish, investitsion faollik, eksport hajmining ortishi, kambag‘allikni qisqartirish, bandlikni ta’minlash, “yashil iqtisodiyot”ni rivojlantirish hamda xalqaro hamkorlikni mustahkamlashga oid jarayonlar batafsil yoritilgan. Shuningdek, kitobda davlat rahbarining hududlarga tashriflari, xalq bilan ochiq muloqotlari, xalqaro sammitlardagi ishtiroki, strategik tashabbuslari va muhim qarorlari izchil bayon etilgan.
Nashr yil davomida sodir bo‘lgan voqealarni xronologik tartibda, oylar kesimida tizimli ravishda yoritadi hamda qo‘shimcha ma’lumotlar, statistik ko‘rsatkichlar va QR-kodlar orqali boyitilgan.
“Yurt qayg‘usida 365 kun” kitobi siyosatshunoslar, tarixchilar, tadqiqotchilar, jurnalistlar hamda keng kitobxonlar ommasi uchun muhim manba sifatida xizmat qiladi.
