Surxondaryoda Ikkinchi jahon urushining so‘nggi qatnashchisi 105 yoshida vafot etdi
Mehnat faxriysi bo‘lgan marhum Shohimardon Hamroyev Voronej, Latviya, Litva va Estoniya hududlarini ozod qilishda munosib hissa qo‘shgan.
Shohimardon Hamroyev Boysun tumanining Temirdarvoza mahallasida 105 yoshida vafot etdi.
Shohimardon ota Ikkinchi jahon urushi yillarida Voronej, Latviya, Litva va Estoniya hududlarida kechgan janglarda ishtirok etgan. U urush davridagi og‘ir sinovlarni matonat bilan yengib o‘tgan, Vatan oldidagi burchini sidqidildan ado etgan fidoyi inson sifatida yodda qoladi.
Urushdan so‘ng u butun umrini ta’lim sohasiga bag‘ishlab, pedagogika yo‘nalishida tahsil olgan hamda qariyb 40 yil davomida rus tili fani o‘qituvchisi sifatida faoliyat yuritgan. Shu davr mobaynida yuzlab shogirdlarga ta’lim va tarbiya bergan.
Shohimardon ota Hamroyev mehnat faoliyati davomida “O‘zbekiston Respublikasi xalq ta’limi a’lochisi” ko‘krak nishoni bilan taqdirlangan.
U Surxondaryo viloyatida hayot bo‘lgan so‘nggi Ikkinchi jahon urushi qatnashchisi edi.
