Turklar Erondan ham yomonroq ahvolga tushadi — Isroil madaniyat vaziri
Miki Zohar “Turkiyaga dushman davlat sifatida muomala qilishni boshlash lozim” degan mazmundagi fikrni ham ilgari surgan.
Isroil madaniyat vaziri Miki Zohar Turkiyaga qarata keskin bayonot berib, agar Anqara Isroil bilan qarama-qarshi yo‘lni tanlasa, og‘ir oqibatlarga duch kelishini aytdi. U bu fikrlarini televizion dasturdagi chiqishi davomida bildirgan. Bu haqda Yeni Şafak yozmoqda.
Ma'lum qilinishicha, Zohar o‘z chiqishida Turkiya prezidenti Rejep Tayyip Erdog‘anning Isroil siyosatiga oid bayonotlariga ham munosabat bildirib, Anqaraning pozitsiyasini “dushman yondashuvi” sifatida baholash kerakligini aytdi. U “Turkiyaga dushman davlat sifatida muomala qilishni boshlash lozim” degan mazmundagi fikrni ham ilgari surgan.
Vazir, shuningdek, Turkiya va Eronni ham qiyoslagan.
“Erdog‘an Isroilga kelib, uni zabt etish uchun armiya tuzmoqchi ekanini aytmoqda, buni sinab ko‘rishlari mumkin. Xuddi shunday fikrda bo‘lgan eronliklar ham bor edi, hozir ularning ahvoliga qarang. Agar turklar ham shunday yo‘l tutsa, yanada og‘irroq vaziyatga tushib qoladi”, — degan.
U G‘azo masalasiga to‘xtalib, Isroil armiyasi haqidagi da’volarga ham munosabatini bildirgan.
G‘azoda 80 mingdan ortiq tinch aholi halok bo‘lganiga oid ayblovlar fonida Zohar Isroil armiyasi tinch aholiga zarar yetkazmayotganini ta’kidlab: “Turkiya bizni falastinliklarga zulm qilayotgan bosqinchi sifatida ko‘rsatmoqchi, lekin bu noto‘g‘ri. Biz dunyodagi eng axloqli armiyaga egamiz”, — degan.
