Afg‘onistonda qizning 12 yoshida turmushga chiqishi qonuniylashtirildi
Tolibon voyaga yetmaganlar o'rtasidagi nikohni tan oladigan yangi oilaviy qonunni qabul qildi.
Afg‘onistonda qizlar 12 yoshida turmushga chiqishlari mumkin va bunday nikohni bekor qilish deyarli imkonsiz, deb xabar beradi focus.ua.
Tolibon ma’muriyati tomonidan oila va nikoh munosabatlarini tartibga soluvchi yangi qonun qabul qilindi. “Turmush o‘rtoqlarni ajratish tamoyillari” deb nomlangan 31 moddadan iborat hujjat Tolibon yetakchisi tomonidan tasdiqlangan.
Qonunda nikohni bekor qilish, bedarak yo‘qolgan shaxslar, dindan qaytish, majburiy ajralish, emizish hamda boshqa oilaviy-huquqiy munosabatlarni tartibga soluvchi qoidalar belgilangan.
Hujjatning eng ko‘p muhokama qilinayotgan jihatlaridan biri voyaga yetmaganlar nikohi bilan bog‘liq normalardir. Qonunga ko‘ra, agar voyaga yetmagan bola (oʻgʻil-qiz) qarindoshlar oʻrtasida turmush qursa, agar er-xotin ijtimoiy jihatdan mos deb hisoblansa va mahr mos boʻlsa, nikoh shartnomasi qonuniy kuchga ega deb hisoblanadi.
Shuningdek, hujjatda nikohni bekor qilish masalasi ham tartibga solingan bo‘lib, voyaga yetmaganlar balog‘at yoshiga yetgandan so‘ng nikohni bekor qilishni talab qilishi mumkinligi qayd etilgan. Ammo bunday nikohni bekor qilish deyarli imkonsiz, chunki bu ish Tolibonning diniy sudi tomonidan ko'rib chiqiladi.
Qonunga muvofiq, oilaviy masalalarda vasiylarning vakolatlari saqlanadi va ayrim hollarda kengaytiriladi. Shuningdek, nikohga rozilik, diniy-huquqiy nizolar hamda er-xotin o‘rtasidagi kelishmovchiliklarni ko‘rib chiqish tartiblari ham belgilangan.
