Andijon va Islomobodda Zahiriddin Muhammad Boburga haykal qo‘yiladi

Prezident Shavkat Mirziyoyev turli sohalardagi bunyodkorlik loyihalari taqdimoti bilan tanishdi. Bu haqda Prezident matbuot xizmati xabar berdi.

 

Ma’lum qilinishicha, Davlat rahbariga Andijon viloyati Bobur shahrida barpo etilishi rejalashtirilayotgan me’moriy ansambl tarkibida buyuk davlat arbobi, sarkarda va shoir Zahiriddin Muhammad Boburga bag‘ishlangan haykal loyihasi taqdim etildi.

 

 

Buyuk ajdod xotirasini munosib ulug‘lash, uning boy ilmiy-adabiy merosi, davlatchilik tafakkuri hamda jahon sivilizatsiyasiga qo‘shgan hissasini yosh avlodga chuqur yetkazish maqsadida yodgorlik alohida mazmun va badiiy yechim asosida yaratilmoqda.

 

Prezidentga haykalning eskizlari, kompozitsion yechimlari va Bobur siymosini aks ettirishga oid ilmiy-badiiy yondashuvlar haqida axborot berildi. 

 

 

Qayd etilishicha, tarixiy shaxs obrazi o‘zbekistonlik olimlar tomonidan xorijiy hamkasblar bilan hamkorlikda olib borilgan tadqiqotlar, tarixiy manbalar, qo‘lyozmalar, miniatyuralar va madaniy meros namunalarini chuqur o‘rganish asosida ishlab chiqilmoqda.

 

Shuningdek, Prezidentning Pokistonga davlat tashrifi doirasida Islomobod shahridagi bog‘lardan biriga Zahiriddin Muhammad Bobur nomi berilgani eslatildi. Ushbu bog‘da ham buyuk ajdodga bag‘ishlab o‘rnatilishi rejalashtirilgan haykal loyihasi ko‘rib chiqildi.

 

 

Davlat rahbari yodgorliklarda Bobur siymosini nafaqat buyuk adib va shoir, balki mohir sarkarda, qudratli davlat asoschisi va donishmand hukmdor sifatida teran ochib berish muhimligini ta’kidladi. Haykalning umumiy qiyofasida uning irodasi, davlatchilik salohiyati, yuksak ma’naviyati va bunyodkorlik g‘oyalari yaqqol ifoda topishi lozimligi qayd etildi.

 

Taqdimot davomida Prezidentga Abu Rayhon Beruniy nomidagi xalqaro maktab-internati moddiy-texnik bazasini takomillashtirish, Buxoro shahrida turizm va transport infratuzilmasini rivojlantirish, shuningdek, tumanlardagi madaniyat uylarini modernizatsiya qilish bo‘yicha ishlab chiqilayotgan loyihalar haqida ham axborot berildi.

 

Yakunda davlat rahbari loyihalarni yanada takomillashtirish hamda ilg‘or tajriba asosida puxta ishlab chiqish yuzasidan tegishli ko‘rsatmalar berdi.