Toshkentda bolalar onkologiyasiga bag'ishlangan EURO Master Course 2026 xalqaro ta'lim kursi bo‘lib o‘tadi

 

2026-yil 19–23-may kunlari Toshkent shahridagi “Swissôtel Tashkent” mehmonxonasida bolalar onkologiyasi va gematologiyasi yo‘nalishidagi yirik xalqaro ta’lim dasturi — EURO Master Course 2026 tashkil etiladi.

 

Mazkur xalqaro kurs bolalarda uchraydigan onkologik kasalliklarni diagnostika qilish, davolash va multidisiplinar kuzatuvning zamonaviy usullariga bag‘ishlanadi.

 

                                       

 

Tadbirda dunyoning 18 davlatidan 70 nafardan ortiq onkolog-shifokorlar va tibbiyot mutaxassislari ishtirok etishi rejalashtirilgan. Jumladan, Qozog‘iston, Qirg‘iziston, Tojikiston, AQSh, Kanada, Niderlandiya, Avstriya, Polsha, Serbiya, Slovakiya, Chexiya, Gretsiya, Ruminiya, Ukraina, Belarus, Ozarbayjon, Albaniya va Armaniston vakillari qatnashadi.

 

                                         

 

Ta’lim kursi doirasida Yevropa, AQSh va Kanadadan tashrif buyuradigan xalqaro ekspertlar tomonidan ma’ruzalar, amaliy seminarlar va klinik muhokamalar o‘tkaziladi. Ular orasida Karl Rössler, Marianne van de Wetering, Anna Raciborska, John Lucas, Jay Malone, Miranda Dierselhuis, Victor Santana, Judith Spijkerman, Liz Sniderman, Geert Janssens, Natalia Stepien, Lizz van der Heijden hamda Annemarie Peek kabi yetakchi mutaxassislar bor.

 

Kurs bolalar onkologiyasi va gematologiyasi sohasida faoliyat yuritayotgan onkologlar, neyroxirurglar, radioterapevtlar, reanimatologlar, palliativ yordam mutaxassislari va boshqa tibbiyot xodimlari uchun ilmiy-ta’lim platformasi vazifasini bajaradi.

 

                                         

 

Tadbir O‘zbekiston Respublikasi Sog‘liqni saqlash vazirligi, Bolalar saratoni bo‘yicha Xalqaro Akademik XAB, Princess Máxima Center for Pediatric Oncology (Niderlandiya) hamda St. Jude Global (AQSh) hamkorligida tashkil etilmoqda.

 

Kurs dasturidan zamonaviy xalqaro davolash protokollari bo‘yicha treninglar, interaktiv ta’lim sessiyalari, murakkab klinik holatlar tahlili, multidisiplinar konsiliumlar, amaliy mahorat darslari va ekspert ma’ruzalari o‘rin olgan.

 

                                         

 

Dastur doirasida bolalarda uchraydigan bosh va orqa miya o‘smalari, ekstrakranial solid o‘smalar, sarkomalar, suyak o‘smalari, immunoterapiya, nur terapiyasi, palliativ yordam, qo‘llab-quvvatlovchi terapiya hamda onkopsixologiya kabi yo‘nalishlar muhokama qilinadi.

 

Shuningdek, xalqaro ekspertlar multidisiplinar yondashuv asosida onkologlar, neyroxirurglar, radiologlar, intensiv terapiya mutaxassislari va hamshiralar o‘rtasidagi hamkorlik bo‘yicha amaliy tajribalar bilan o‘rtoqlashadi.

 

                                   

 

Mutaxassislar kurs davomida zamonaviy xalqaro davolash standartlari, innovatsion yondashuvlar, ilg‘or diagnostika usullari va bemorlar hamda ularning oilalarini qo‘llab-quvvatlashning yangi mexanizmlari bilan yaqindan tanishish imkoniyatiga ega bo‘ladi.

 

EURO Master Course 2026 xalqaro kursining O‘zbekistonda o‘tkazilishi mahalliy mutaxassislar malakasini oshirish, xalqaro klinik tajribani joriy etish hamda sog‘liqni saqlash sohasida xalqaro hamkorlikni mustahkamlash yo‘lida muhim bosqich sifatida baholanmoqda.