“Yilning eng yaxshi tarbiyachisi – 2026” kasbiy ko‘rik-tanlovi g‘oliblari taqdirlandi
Bugungi kunda mamlakat bo‘ylab 39 mingdan ortiq maktabgacha ta’lim tashkilotlari faoliyat yuritmoqda.
Muhammad Al-Xorazmiy nomidagi ixtisoslashtirilgan maktabda “Yilning eng yaxshi tarbiyachisi – 2026” kasbiy ko‘rik-tanlovining tantanali taqdirlash marosimi bo‘lib o‘tdi.
Tadbirda O‘zbekiston maktabgacha va maktab ta’limi vaziri Karimova E’zozxon G‘opirjonovna ishtirok etib, barcha qatnashchilar va g‘oliblarni ushbu quvonchli kun bilan samimiy muborakbod etdi. Vazir o‘z nutqida tarbiyachilarning yosh avlod tarbiyasidagi o‘rni beqiyos ekanini ta’kidlab, bugungi kunda mamlakat bo‘ylab 39 mingdan ortiq maktabgacha ta’lim tashkilotlari faoliyat yuritayotganini ma’lum qildi.
Shuningdek, tadbirda o‘zbek estradasining taniqli vakillari — Nilufar Usmonova hamda Hamdam Sobirov ham ishtirok etib, marosimga bayramona kayfiyat ulashdi.
Manbalarga ko‘ra, mazkur tanlov tarbiyachilarning kasbiy mahorati, ijodiy yondashuvi hamda ta’lim-tarbiya jarayonidagi ilg‘or tajribalarini ommalashtirish maqsadida tashkil etildi. Tanlov davomida ishtirokchilar turli shartlar asosida o‘z bilim va salohiyatlarini namoyon etdi.
Yakunda g‘olib va faol ishtirokchilar diplom hamda esdalik sovg‘alari bilan taqdirlandi. Tadbir ko‘tarinki ruhda o‘tib, barchaga ezgu tilaklar bildirildi.
