Britaniya qiroli Charlz III “vafot etdi” — Radio Caroline
Radiostansiya efirida texnik xato sabab qirolning vafoti haqida noto‘g‘ri xabar tarqatildi va keyinchalik tinglovchilar hamda qirollik oilasidan uzr so‘raldi.
Britaniyaning Radio Caroline radiostansiyasi efir vaqtida texnik xatolik tufayli qirol Charlz III vafoti haqida noto‘g‘ri xabar e’lon qildi. Keyinchalik stansiya mazkur holat yuzasidan tinglovchilar hamda qirollik oilasidan rasman uzr so‘radi.
Ma’lum qilinishicha, hodisa 19-may kuni kunduzgi efir jarayonida yuz bergan. Tinglovchilar efirda monarxning vafoti haqida shoshilinch e’lon berilganini bildirgan, shundan so‘ng eshittirish vaqtincha to‘xtatilgan.
Keyinchalik boshlovchilar efirni davom ettirib, yuzaga kelgan holat texnik nosozlik bilan bog‘liq ekanini ma’lum qilgan va tinglovchilardan uzr so‘ragan. Radiostansiya direktori Piter Mur ham holat “monarx vafoti bo‘yicha ogohlantirish tizimi tasodifan faollashgani” natijasida yuz berganini bildirgan.
Shuningdek, Radio Caroline qirollik oilasi bilan uzoq yillik hamkorlik an’anasini davom ettirishini va kelgusida bunday holatlar takrorlanmasligini ta’kidlagan.
Hodisadan bir kun oldin, Charlz III Qirollik bog'dorchilik jamiyati (RHS) tomonidan har yili tashkil etiladigan Chelsea gullar ko'rgazmasida ishtirok etgan.
