Navoiy viloyatida sel oqibatida yo‘l to‘silib, 4 ta avtomobil zarar ko‘rdi
Aholi xavfsizligini ta’minlash maqsadida Angidon, Langar, Kattasoy va Maydon soylari yaqinida yashovchi fuqarolar xavfsiz hududga ko‘chirilgan.
Navoiy viloyatida yuzaga kelgan selda 4 avtomobil zarar ko‘rdi, odamlar xavfsiz hududga ko‘chirildi. Bu haqda FVV xabar berdi.
Ma’lum qilinishicha, 21-may kuni soat 13:45 dan 15:40 ga qadar Navoiy viloyatining Xatirchi, Karmana va Nurota tumanlarining tog‘li va tog‘ oldi hududlarida kuzatilgan kuchli yog‘ingarchilik natijasida sel-suv oqimlari yuzaga kelgan.
Xususan, Xatirchi tumanida avtomobil yo‘lining bir qismi xarsang toshlar bilan to‘silib qolishi natijasida 4 ta "Nexia-1", "Cobalt", "Nexia-3" va "Uaz-469" rusumli avtomobillar va bir nechta uy-joylar sel oqimlaridan zarar ko‘rgan. Aholi xavfsizligini ta’minlash maqsadida Angidon, Langar, Kattasoy va Maydon soylari yaqinida yashovchi fuqarolar vaqtinchalik xavfsiz hududga ko‘chirilgan.
Karmana tumanida sel suvlari 7 ta aholi xonadonining tomorqa maydoni va qo‘shimcha qurilmalariga kirgan.
Nurota tumanining ayrim hududlarida ham sel oqimlari qayd etilgan. Sel suvlari sel yo‘llaridan zararsiz o‘qib o‘tgan.
Vaziyat oqibatlarini bartaraf etish maqsadida jami 37 ta maxsus texnika va 173 nafar shaxsiy tarkib jalb etilgan.
FVV o'rganishlari natijasiga ko‘ra, aholi xonadonlari, ijtimoiy infratuzilma obyektlari va kommunikatsiya tarmoqlariga jiddiy zarar yetmagan. Tan jarohati olgan fuqarolar to‘g‘risida ma’lumot kelib tushmagan.
Qayd etilishicha, hozirda Navoiy viloyati FVB hamda FVDT xizmatlari tomonidan tezkor choralar ko‘rilib, vaziyat oqibatlarni bartaraf etish ishlari olib borilmoqda. Ayni paytda vaziyat to‘liq nazoratga olingan bo‘lib, hududlarda monitoring ishlari davom ettirilmoqda.
