Afg‘onistonda toshqinlar oqibatida 24 kishi halok bo‘ldi

Afg‘onistonda kuchli yomg‘ir va suv toshqinlari oqibatida so‘nggi 48 soat ichida kamida 24 kishi halok bo‘ldi. Bu haqda Arab News xabar berdi.

 

Ma’lumotlarga ko‘ra, oxirgi bir sutka davomida mamlakat shimolidagi Bag‘lon viloyatida 15 kishi, shimoli-sharqdagi Badaxshon viloyatida ikki kishi va markaziy Vardak viloyatida bir kishi sel oqimlari oqibatida halok bo‘lgan.

 

Bag‘lon viloyati gubernatori matbuot kotibi, suv toshqinlari oqibatida o‘nlab odamlar jarohatlanganini ma’lum qildi.

 

Badaxshon viloyatidagi mahalliy rasmiylarga ko‘ra, ikki kishi bedarak yo‘qolgan, 100 dan ortiq turar joy vayron bo‘lgan.

 

Chorshanba kunidan buyon davom etayotgan kuchli yomg‘irlar Afg‘onistonning bir qator hududlarida suv toshqinlarini yuzaga keltirgan. Payshanba kuni mamlakatning boshqa viloyatlarida ham yana olti kishi halok bo‘lgani xabar qilindi.

 

Afg‘onistonning tabiiy ofatlarni boshqarish milliy boshqarmasi vakilining aytishicha, so‘nggi 24 soat ichida 11 kishi jarohat olgan.

 

Mart oyining oxiridan buyon mamlakatda kuzatilayotgan noqulay ob-havo suv toshqinlari va ko‘chkilarga sabab bo‘lib, uy-joylar hamda qishloq xo‘jaligi maydonlariga katta zarar yetkazmoqda.

 

Aprel oyida ham Afg‘onistonda kuchli yomg‘ir va suv toshqinlari oqibatida kamida 148 kishi halok bo‘lgan, 137 kishi jarohatlangan.

 

Mutaxassislar Afg‘oniston infratuzilmasining zaifligi va iqlim o‘zgarishi ekstremal ob-havo hodisalarining ko‘payishiga sabab bo‘layotganini ta’kidlamoqda.