Jizzaxda jarimadan qochib, davlat raqamisiz harakatlangan Malibu haydovchisi ushlandi
Maʼlum bo‘lishicha, fuqaroning bankdan 200 mln qarzi mavjud. Mashina esa uzoq vaqt qidiruvda bo‘lgan.
Majburiy ijro byurosining Jizzax viloyati boshqarmasi ish yurituvida bank foydasiga 200 million so‘mdan ortiq qarzdorlikni undirish haqidagi ijro hujjati mavjud bo‘lib, mazkur ish doirasida uzoq vaqtdan buyon qidiruvda bo‘lgan “Malibu-2” rusumli avtotransport vositasini aniqlash bo‘yicha tezkor tadbirlar olib borildi.
Tadbirlar davomida avtomashina davlat raqami yechilgan holda topildi. Biroq bu uni yashirish uchun yetarli bo‘lmadi. Mutaxassislar transport vositasining VIN-kodi orqali uning haqiqiy davlat raqami va egasiga aniqlik kiritishdi.
Shundan so‘ng avtomashina belgilangan tartibda jarima maydonchasiga joylashtirildi va keyingi ijro harakatlari boshlandi.Qonunchilikka muvofiq, sud qarorlari va ijro hujjatlarini bajarmaslik mol-mulk xatlovi, qidiruv va boshqa majburiy choralarga sabab bo‘ladi.
