llon Mask dunyodagi ilk trillionerga aylanishi mumkin
SpaceX’ning bozor qiymati qariyb 1,75 trillion dollarga baholanmoqda.
Amerikalik tadbirkor va milliarder Ilon Mask dunyodagi ilk trillionerga aylanishi mumkin. Bunga uning SpaceX kompaniyasining AQSh fond bozorida ommaviy aksiyalar savdosiga chiqish rejasi sabab bo‘lmoqda. Bu haqda The Guardian xabar berdi
Ma’lum qilinishicha, raketa va sun’iy yo‘ldosh ishlab chiqaruvchi SpaceX kompaniyasi 24 yil ichida ilk bor batafsil moliyaviy hisobotlarini e’lon qilgan. Kompaniya 12-iyun kuni Nasdaq birjasida “SPCX” savdo belgisi ostida ro‘yxatga olinadi.
Dastlabki baholashlarga ko‘ra, SpaceX’ning bozor qiymati qariyb 1,75 trillion dollarni tashkil etmoqda. Kompaniya IPO orqali 80 milliard dollargacha investitsiya jalb qilishni rejalashtirgan.
Mutaxassislarning ta’kidlashicha, ushbu IPO Wall Street tarixidagi eng yirik ommaviy aksiyalar joylashtirishlaridan biri bo‘lishi mumkin. Bu esa Ilon Mask boyligining yanada oshishiga xizmat qilishi kutilmoqda. Hozirda Forbes nashri uning boyligini 807 milliard dollar atrofida baholamoqda.
Shuningdek, e’lon qilingan hujjatlarda SpaceX’ning sun’iy intellekt sohasidagi Anthropic kompaniyasi bilan tuzgan yirik kelishuvi tafsilotlari ham ochiqlangan. Unga ko‘ra, Anthropic kompaniyasi xAI ma’lumotlar markazlaridan foydalanish uchun yiliga 15 milliard dollar to‘laydi.
SpaceX kompaniyasi raketa va kosmik texnologiyalar, Starlink sun’iy yo‘ldosh internet tizimi hamda sun’iy intellekt loyihalari bilan shug‘ullanadi. Kompaniya, shuningdek, avval Twitter nomi bilan tanilgan X ijtimoiy tarmog‘iga ham egalik qiladi.
Eslatib o‘tamiz, Ilon Mask avvalroq 800 milliard dollardan ortiq boylikka ega bo‘lgan dunyodagi ilk inson sifatida qayd etilgandi.
