O'zbekistondagi korrupsiya mojarosi: Beeline investorlarga kompensatsiya to'laydi
Kompaniya O‘zbekiston telekom bozoridagi faoliyati, korrupsiya bilan bog‘liq xavflar va kompaniyaning bozor natijalari haqida investorlarga to‘liq hamda haqqoniy ma’lumot bermaganlikda ayblagan.
AQSh sudi Beeline brendi bilan tanilgan VEON xalqaro telekommunikatsiya kompaniyasiga qarshi aksiyadorlar tomonidan kiritilgan da’vo bo‘yicha suddan tashqari kelishuvni tasdiqladi.
Ma’lum qilinishicha, kompaniya investorlar bilan 20 million dollar miqdoridagi kelishuvga erishgan. Ushbu mablag‘ da’vogar investorlar o‘rtasida taqsimlanadi.
Da’vogarlar VEON’ni O‘zbekiston telekom bozoridagi faoliyati, korrupsiya bilan bog‘liq xavflar va kompaniyaning bozor natijalari haqida investorlarga to‘liq hamda haqqoniy ma’lumot bermaganlikda ayblagan.
Mazkur ish VEON’ning O‘zbekiston bozoriga kirish jarayoni bilan bog‘liq ko‘p yillik korrupsiya mojarolari fonida ko‘rib chiqildi. Avvalroq AQSh va Niderlandiya rasmiylari tomonidan kompaniya faoliyati yuzasidan xalqaro tergovlar o‘tkazilgan edi.
VEON — Niderlandiyada ro‘yxatdan o‘tgan xalqaro telekommunikatsiya va raqamli xizmatlar kompaniyasi hisoblanadi. Kompaniya avval “VimpelCom” nomi ostida faoliyat yuritgan bo‘lib, “Beeline” brendi orqali Rossiya va MDH davlatlarida keng tarmoqqa ega bo‘lgan.
Eslatib o‘tamiz, 2016 yilda VEON O‘zbekiston telekom bozori bilan bog‘liq korrupsiya ishlari yuzasidan AQSh va Niderlandiya rasmiylari bilan yirik moliyaviy kelishuvlarga ham erishgan edi.
