Samarqandda MIB orqali qidiruvdagi mashina topilib, jarima maydonchasiga joylashtirildi
Maʼlum bo‘lishicha, fuqaro qarzini to‘lamasdan, o‘ziga tegishli “Mercedes Benz”ni yaqinlariga tegishli manzillarda yashirib yurgan.
Majburiy ijro byurosi Samarqand viloyat boshqarmasi Qidiruv shoʻbasi xodimlari tomonidan olib borilgan tezkor tadbirlar natijasida bank foydasiga undirilishi lozim bo‘lgan qarzdorlik bilan bog‘liq navbatdagi ijro harakati taʼminlandi.
Maʼlum bo‘lishicha, Samarqand shahrida yashovchi fuqaro S.T.dan mikromoliya tashkiloti foydasiga 6,6 million so‘m qarzdorlikni undirish belgilangan bo‘lib, unga tegishli “Mercedes Benz 200” rusumli avtotransport vositasiga qidiruv eʼlon qilingan.
Tezkor tadbirlar davomida qarzdor avtotransport vositasidan doimiy ravishda foydalanmasdan, uni yaqinlariga tegishli manzillarda saqlab yurgani aniqlangan. Shu bois transport vositasining aniq joylashuvini belgilash maqsadida bir necha manzillar o‘rganib chiqildi.
Olib borilgan qidiruv ishlari natijasida avtomashina navbatdagi yashirin saqlanayotgan manzildan topildi. Natijada transport vositasi belgilangan tartibda xatlanib, jarima maydonchasiga joylashtirildi. Tezkor qidiruv tadbirlari davom etmoqda.
