“Sifatli davlat boshqaruvi” dasturida eng namunali xodimlar aniqlandi

 

Prezident Shavkat Mirziyoyev raisligida o‘tgan “Sifatli davlat boshqaruvi” dasturi doirasidagi forum va taqdirlash marosimida davlat xizmatchilari o‘rtasida eng namunali xodimlar aniqlanib, g‘oliblar e’lon qilindi.

Tanlov natijalariga ko‘ra, Tog‘-kon sanoati va geologiya vazirligi boshqarma boshlig‘i Maqsud Bolibekov eng namunali rahbar xodim, Oliy ta’lim, fan va innovatsiyalar vazirligi bo‘lim boshlig‘i Fazliddin Mo‘minov eng namunali ma’muriy xodim, O‘zatom agentligi bosh mutaxassisi Shoxmirzo Umarov eng namunali mutaxassis xodim sifatida e’tirof etildi.

Shuningdek, Kambag‘allikni qisqartirish va bandlik vazirligi vaziri maslahatchisi Ummatoy Yo‘ldosheva eng namunali ayol xodim, Oliy ta’lim, fan va innovatsiyalar vazirligi loyiha ofisi rahbari Akbarxon Sobirxonov eng namunali iste’dodli yosh xodim, Adliya vazirligi bo‘lim boshlig‘i Mirsaid Raxmatov esa inson resurslari bo‘yicha eng namunali xodim sifatida taqdirlandi.

 

Davlat rahbari barcha g‘oliblarning lavozimini bir pog‘ona ko‘tarish va ularni rahbar kadrlar zaxirasiga kiritishni taklif qildi. Ularning kasbiy salohiyati, innovatsion yondashuvi va doimiy o‘z ustida ishlashi boshqa xodimlar uchun namuna ekani alohida ta’kidlandi.

Prezident, shuningdek, kelgusida samaradorligi past bo‘lgan davlat idoralari nomi ham ochiq e’lon qilinishini ma’lum qildi.

“Sifatli davlat boshqaruvi” dasturi endilikda har ikki yilda o‘tkazilib, kelgusi bosqichlarda mahalliy hokimliklar ham tanlov jarayoniga jalb etilishi belgilandi.

Tadbir yakunida davlat xizmatchilarini taqdirlash marosimi bo‘lib o‘tdi.