“Sifatli davlat boshqaruvi” forumida eng namunali vazirliklar e’lon qilindi

 

Prezident Shavkat Mirziyoyev “Sifatli davlat boshqaruvi” dasturi bo‘yicha forum va taqdirlash marosimida nutq so‘zlab, mamlakatda amalga oshirilayotgan islohotlar markazida inson qadri va xalq manfaatlari ustuvor o‘rin tutayotganini ta’kidladi.

Forum davomida davlat boshqaruvi tizimiga ilg‘or va zamonaviy yondashuvlarni joriy etish borasida amalga oshirilayotgan ishlar haqida ham so‘z yuritildi. Xususan, Birlashgan Arab Amirliklari bilan davlat boshqaruvi yo‘nalishidagi hamkorlik yangi bosqichga chiqqani alohida ta’kidlandi.

Prezident “Sifatli davlat boshqaruvi” dasturini amalga oshirishdagi ko‘magi uchun Amirliklar rahbariyati hamda Hukumat ishlari bo‘yicha vaziri Mohammad Al Gergaviga minnatdorlik bildirdi.

Tanlov natijalariga ko‘ra, Adliya vazirligi “O‘zbekiston – 2030” strategiyasini amalga oshirish bo‘yicha eng namunali vazirlik deb topildi. Qayd etilishicha, vazirlik bugungi kunda 30 ta platforma orqali 380 ta to‘liq raqamlashtirilgan xizmatni taqdim etmoqda va 780 dan ortiq xizmatdan onlayn foydalanish imkoniyati yaratilgan.

Shuningdek, Tog‘-kon sanoati va geologiya vazirligi resurslarni boshqarish bo‘yicha eng namunali vazirlik sifatida e’tirof etildi. Vazirlik tomonidan geologiya-qidiruv ishlarida suv sarfi 20 foizga qisqartirilgani va asosiy uskunalarni mahalliylashtirish darajasi 84 foizga yetkazilgani qayd etildi.

Ichki ishlar vazirligi esa davlat xizmatlarini ko‘rsatishdagi ijobiy natijalari uchun eng namunali vazirlik deb topildi. Hozirda vazirlik tomonidan ko‘rsatilayotgan xizmatlarning 95 foizi to‘liq raqamli shaklga o‘tkazilgani ma’lum qilindi.