Surxondaryoda soliq qarzlari sabab mashinalar xatlanmoqda
Jumladan, Qumqo‘rg‘onda “Volkswagen”, “Howo” va 2 ta “BYD” avtomashinlari qarzdorlik evaziga xatlandi.
Soliqlarni o‘z vaqtida to‘lash davlat va jamiyat taraqqiyoti, pensiya, nafaqa hamda ijtimoiy himoya to‘lovlarini taʼminlashda muhim ahamiyatga ega. Soliq qarzdorligini o‘z vaqtida bartaraf etmaslik esa jarima va mol-mulkni xatlovga olish kabi cheklovlarga sabab bo‘lishi mumkin.
Majburiy ijro byurosi hamda soliq xizmati organlari tomonidan Qumqo‘rg‘on tumanida o‘tkazilgan tadbirlar davomida qarzdorlarga tegishli 3 ta elektromobil va 1 ta “Howo” yuk avtomashinasi xatlovga olindi.
Jumladan, “J.Z.” fermer xo‘jaligining 427 million so‘m soliq qarzdorligi mavjud bo‘lib, qarzdorlik bartaraf etilmagani sababli unga tegishli “Volkswagen” rusumli elektromobil xatlov qilindi hamda auksion orqali sotilishi haqida rasman ogohlantirildi.
Tadbirlar natijasida Qumqo‘rg‘on tumanida so‘nggi ikki haftada jami 1 mlrd 323 mln so‘m soliq qarzdorligi undirilishi taʼminlandi. Bu kabi tadbirlar viloyat bo‘ylab davom ettirilmoqda.
