Tinchlik kengashi G'azoni tiklash bo'yicha 15 banddan iborat rejasini taqdim etdi
Rejada XAMASni bosqichma-bosqich qurolsizlantirish va Isroil qo‘shinlarini hududdan olib chiqish nazarda tutilgan.
G‘azo sektoridagi vaziyatni barqarorlashtirish va tinchlik jarayonini yo‘lga qo‘yishga qaratilgan 15 banddan iborat “yo‘l xaritasi” taqdim etildi. Bu haqda The Jerusalem post nashri xabar berdi.
G‘azo Tinchlik kengashi bosh direktori Nikolay Mladenov X ijtimoiy tarmog‘idagi sahifasi orqali Donald Trampning G‘azo bo‘yicha keng qamrovli tinchlik rejasini amalga oshirishga qaratilgan taklifni eʼlon qildi.
Maʼlum qilinishicha, reja XAMASni bosqichma-bosqich qurolsizlantirish, Isroil mudofaa kuchlarini G‘azo hududidan chiqarish, xalqaro monitoring tizimini joriy etish hamda Falastin boshqaruv tuzilmalarini mustahkamlash kabi muhim yo‘nalishlarni o‘z ichiga oladi.
Taʼkidlanishicha, qurolsizlanish jarayoni bir tomonlama emas, balki Falastin boshchiligida va xalqaro hamjamiyat ishtirokida bosqichma-bosqich amalga oshirilishi ko‘zda tutilgan.
Rejaga muvofiq:
— BMT Xavfsizlik Kengashi rezolyutsiyasi asosida tinchlik jarayoniga sodiqlik taʼminlanishi;
— gumanitar yordam, yonilg‘i taʼminoti va nazorat punktlari faoliyati bo‘yicha kelishuvlar bajarilishi;
— xalqaro monitoring mexanizmi joriy qilinishi;
— G‘azoda vaqtinchalik fuqarolik boshqaruvi tuzilishi;
— qurolli tuzilmalarni davlat boshqaruvidan ajratish;
— xavfsizlik faqat rasmiy Falastin tuzilmalari tomonidan taʼminlanishi;
— politsiya tizimini isloh qilish;
— noqonuniy qurollarni bosqichma-bosqich topshirish;
— ichki qurolli to‘qnashuvlar va zo‘ravonliklarni taqiqlash;
— xalqaro barqarorlashtirish kuchlarini vaqtincha joylashtirish;
— Isroil qo‘shinlarini G‘azodan bosqichma-bosqich chiqarish kabi vazifalar belgilangan.
Shuningdek, rejada G‘azoni qayta tiklash uchun hududda tinchlik, xavfsizlik va rasmiy boshqaruv to‘liq taʼminlanishi zarurligi qayd etilgan.
