Toshkentda kredit qarzi sabab yuk mashinasi xatlandi
Avtomashina 1 mlrd so‘mlik qarzdorlik evaziga xatlanib, sotuvga chiqarilgan.
MIBning Toshkent shahar boshqarmasi ish yurituvida Toshkent tumanlararo iqtisodiy sudining 2025 yil 22 iyuldagi ijro varaqasiga asosan qarzdor “A.U.” MCHJdan undiruvchi bank foydasiga 1 mlrd 266 mln 407 ming 910 so‘m qarzdorlikni undirish bo‘yicha ijro harakatlari olib borilmoqda.
Sud qaroriga muvofiq, undiruv qarzdor korxonaga tegishli bo‘lgan 2 ta “HOWO” rusumli yuk avtotransport vositalariga qaratilgan.
Qarzdor tomonidan belgilangan ixtiyoriy muddatda qarzdorlik bartaraf etilmagani sababli davlat ijrochilari tomonidan majburiy ijro harakatlari boshlanib, mazkur avtotransport vositalariga nisbatan qidiruv eʼlon qilindi.
Qidiruv tadbirlari davomida “HOWO” rusumli avtotransport vositasi aniqlanib, jarima maydonchasiga joylashtirildi hamda belgilangan tartibda xatlandi. Shundan so‘ng avtomashina elektron auksion savdolariga chiqarildi.
Biroq, o‘tkazilgan savdolarda avtotransport vositasi sotilmagani sababli, amaldagi tartibga muvofiq uning boshlang‘ich narxi 25 foizga arzonlashtirilib, 731 million 250 ming so‘m miqdorida qayta savdoga qo‘yildi.
Ayni vaqtda qolgan qarzdorlikni undirish hamda sud qarorining to‘liq ijrosini taʼminlash choralari ko‘rilmoqda.
