AQSh Ebola xavfi tufayli ayrim “green card” egalari uchun mamlakatga kirishni vaqtincha chekladi
Avval bunday cheklovlar yashil karta egalari uchun amal qilmagan.
AQSh ma’muriyati Ebola epidemiyasi kuzatilayotgan hududlarga tashrif buyurgan ayrim yashil karta (“green card”) egalari uchun mamlakatga kirishga vaqtinchalik cheklov joriy etdi. Bu haqda The Washington Post xabar berdi.
Ma’lum qilinishicha, yangi tartib so‘nggi 21 kun ichida Kongo Demokratik Respublikasi, Uganda yoki Janubiy Sudan hududlariga tashrif buyurgan AQShning qonuniy doimiy rezidentlariga nisbatan qo‘llaniladi. Avval bunday cheklovlar yashil karta egalari uchun amal qilmagan.
AQSh sog‘liqni saqlash vaziri Robert F. Kennedy Jr. mazkur qarorni imzolagan bo‘lib, u ushbu chorani “jamoat salomatligi manfaatlariga mos va zarur ehtiyot chorasi” deb atagan.
Hujjatda ta’kidlanishicha, Ebola kabi xavfli infeksiyalar bilan bog‘liq karantin choralarini tashkil etish katta resurs va maxsus izolyatsiya infratuzilmasini talab qiladi. Shu sababli hukumat epidemiologik xavfni kamaytirish maqsadida kirish nazoratini kuchaytirishga qaror qilgan.
AQSh rasmiylariga ko‘ra, mazkur choralar mamlakat hududida xavfli yuqumli kasalliklar tarqalishining oldini olishga qaratilgan bo‘lib, vaziyatdan kelib chiqib qayta ko‘rib chiqilishi mumkin.
