AQSh “Grin karta” olish tartibini keskin kuchaytirdi

 

AQSh Fuqarolik va Immigratsiya xizmati yangi immigratsiya qoidalarini e’lon qildi. Unga ko‘ra, endilikda yashil karta olish uchun murojaat qilayotgan shaxslar ariza topshirish jarayonida AQSh hududini tark etishi va hujjatlarni xorijdan topshirishi kerak bo‘ladi.

 

USCIS bayonotida ta’kidlanishicha, ushbu choralar doimiy yashash huquqi rad etilganidan so‘ng mamlakatda noqonuniy qolib ketayotgan immigrantlar sonini kamaytirishga qaratilgan.

 

Ma’lum qilinishicha, talabalar, vaqtinchalik ishchilar va sayyohlar kabi noimmigratsion viza egalari tashrif maqsadi yakunlangach AQShni tark etishi kerak. USCIS vakillari “AQShga tashrif yashil karta olishning boshlang‘ich bosqichiga aylanmasligi lozim” ekanini ta’kidlagan.

 

Shuningdek, yangi tartib orqali immigratsiya ishlari asosan AQShning xorijdagi konsulliklari orqali ko‘rib chiqilishi rejalashtirilmoqda. Bu esa USCIS resurslarini fuqarolik olish, odam savdosi va zo‘ravonlik qurbonlari uchun vizalar kabi ustuvor yo‘nalishlarga yo‘naltirish imkonini beradi.

 

CNN telekanali ma’lumotiga ko‘ra, yangi qoidalar minglab oilalarning ajralishiga, ish joylarini yo‘qotishiga va hujjatlarni ko‘rib chiqish uzoq davom etishi sababli immigratsion noaniqliklarning kuchayishiga olib kelishi mumkin.

 

Bundan tashqari, Tramp ma’muriyati tomonidan “oltin karta” dasturi ham ishga tushirilgan. Mazkur tizimga ko‘ra, arizachilar tezlashtirilgan ko‘rib chiqish uchun 15 ming dollar to‘laydi va keyinchalik AQShda yashash hamda ishlash imkonini beruvchi maxsus maqom olish uchun 1 million dollarlik depozit kiritadi.