Namanganda 1 yoshli chaqaloq hojatxonaga tushib ketdi
Hodisaga ehtiyotsizlik va nazoratdan chetda qolgani sabab bo'lgan.
Favqulodda vaziyatlar vazirligi ma’lumotiga ko‘ra, hodisa kecha, 22-may kuni soat 18:47 atrofida tumanning “Muborak” mahalla fuqarolar yig‘ini hududida sodir bo‘lgan.
Qayd etilishicha, 2025-yilda tug‘ilgan o‘g‘il bola ehtiyotsizlik va nazoratdan chetda qolgani sababli yashash uyining hovlisidagi hojatxonaga tushib ketgan.
Hodisa joyiga Favqulodda vaziyatlar vazirligi qutqaruvchilari zudlik bilan yetib borib, qutqaruv ishlarini boshlagan. Qutqaruvchilardan biri hojatxona chuquriga tushib, bolakayni olib chiqqan.
Shifokorlar tomonidan bolaga birlamchi tibbiy yordam ko‘rsatilganidan so‘ng u yaqinlariga topshirilgan. Hozirda bolaning ahvoli yaxshi ekani ma’lum qilindi.
Avvalroq Samarqand viloyatida ham shunga o‘xshash holat kuzatilib, Favqulodda vaziyatlar vazirligi qutqaruvchilari tomonidan hojatxonaga tushib ketgan bola qutqarilgani xabar qilingan edi.
