Navoiyda ko‘p qavatli uy “podval” ida noqonuniy basseyn qurilgani aniqlandi
Holat yuzasidan huquqbuzar 20 mln 600 ming so‘m jarimaga tortilgan.
Navoiy viloyatida ko‘p qavatli uylarning texnik holatini o‘rganish maqsadida o‘tkazilgan nazorat tadbirlari davomida Zarafshon shahridagi uylarning birida qator qonunbuzilish holatlari aniqlandi. bU HAQDA Qurilish va uy-joy kommunal xo'jaligi nazorati inspeksiyasi matbuot xizmati xabar berdi.
Ma’lum qilinishicha, Zarafshan shahrining 12-kichik hududida joylashgan ko‘p qavatli uylardan birida mulkdor tomonidan birinchi qavatdagi xonadondan podvalga tushish uchun o‘zboshimchalik bilan yo‘lak ochilgan.
Shuningdek, podval qismi noqonuniy ravishda egallab olingani hamda xonadon hududida ruxsatsiz tarzda basseyn qurilgani aniqlangan.
Mutaxassislar bunday noqonuniy qurilish ishlari ko‘p qavatli uyning konstruktiv mustahkamligiga salbiy ta’sir ko‘rsatishi, bino texnik holatining zaiflashishiga olib kelishi va aholi xavfsizligiga bevosita tahdid tug‘dirishi mumkinligini ta’kidlagan.
Aniqlangan holatlar yuzasidan huquqbuzar shaxsga nisbatan amaldagi tartib asosida bazaviy hisoblash miqdorining 50 baravari miqdorida jarima qo‘llanilgan.
Bundan tashqari, noqonuniy qurilishlarni avvalgi holatiga qaytarish bo‘yicha majburiy yozma ko‘rsatma berilgan. Belgilangan muddatda kamchiliklar bartaraf etilmasa, majburiy tartibda tegishli choralar ko‘rilishi ma’lum qilingan.
