Xitoydagi ko‘mir konida yuz bergan portlashda 90 kishi halok bo‘ldi
Portlash paytida kon hududida jami 247 nafar ishchi bo‘lgan.
Xitoyning shimolidagi Shansi provinsiyasining Qinyuan okrugida joylashgan “Lushenyu” ko‘mir konida yuz bergan gaz portlashi oqibatida halok bo‘lganlar soni 90 nafarga yetdi. Bu haqda BBC ma’lum qildi.
Dastlabki ma’lumotlarga ko‘ra, hodisa 22-may kuni mahalliy vaqt bilan soat 19:29 da sodir bo‘lgan. Portlash paytida kon hududida jami 247 nafar ishchi bo‘lgan.
Avvalroq 82 nafar konchi halok bo‘lgani va 9 kishi bedarak yo‘qolgani haqida xabar berilgan edi. Keyinchalik qurbonlar soni yana ortgani ma’lum qilingan. Hozirda qidiruv-qutqaruv ishlari davom etmoqda.
Xitoy raisi Si Szinpin voqea yuzasidan barcha zarur choralarni ko‘rish, jabrlanganlarga yordam ko‘rsatish hamda omon qolganlarni izlash bo‘yicha barcha imkoniyatlarni safarbar etishga chaqirgan. Shuningdek, u hukumatga avariya sabablarini chuqur o‘rganish va aybdorlarni javobgarlikka tortish bo‘yicha topshiriq bergan.
Vakolatli organlar tomonidan hodisa sabablari yuzasidan tergov harakatlari olib borilmoqda.
