Toshkentda Tesla’ni 214 km tezlikda boshqargan haydovchiga chora ko‘rildi
Haydovchi o‘z murojaatida yuqori tezlikda harakatlangani uchun pushaymon ekanini aytgan.
Toshkent shahrida Tesla avtomobilini yuqori tezlikda boshqarib, 214 km/soatgacha tezlikka chiqqan haydovchiga nisbatan qonuniy chora ko‘rildi. Bu haqda poytaxt IIBB Axborot multimedia markazi boshlig‘i o‘rinbosari ma’lum qildi.
Holat aks etgan video avvalroq ijtimoiy tarmoqlarda tarqalib, keng muhokamalarga sabab bo‘lgan edi. Foydalanuvchilar bunday harakat yo‘l harakati ishtirokchilari hayoti uchun jiddiy xavf tug‘dirishini ta’kidlab, mutasaddilardan chora ko‘rishni talab qilgan.
Ma’lum qilinishicha, avtomobil haydovchisi poytaxt Yo‘l harakati xavfsizligi boshqarmasining qidiruv bo‘limi xodimlari tomonidan chaqirtirilgan.
Haydovchi o‘z murojaatida yuqori tezlikda harakatlangani uchun pushaymon ekanini aytgan.
“Tesla avtomashinasining egasiman. Katta tezlikda haydaganim ijtimoiy tarmoqlarga tarqalib ketibdi. Shu yuzasidan shahar qidiruv bo‘limiga chaqirishdi. Hozir qonuniy chora ko‘rishyapti. Hech kimga bunaqa tez yurishni tavsiya qilmayman, sekin yuringlar, ehtiyot bo‘linglar. Qilgan ishimdan pushaymonman”, — dedi u.
Xabarda haydovchiga tegishli tartibda chora ko‘rilgani qayd etilgan. Biroq qanday chora qo‘llanganiga aniqlik kiritilmagan.
