Ogohlantirishga qaramay "rul"ga o‘tirgan 238 nafar bitiruvchi ushlandi
Ayrim viloyatlarda bitiruv tadbiriga avtomobil boshqarib kelgan qizlar ham aniqlangan.
Yo‘l harakati xavfsizligi xizmati “So‘nggi qo‘ng‘iroq” tadbirlari kuni maktab o‘quvchilari tomonidan avtomashinalardan noqonuniy foydalanish bilan bog‘liq 238 ta holat aniqlanganini ma’lum qildi.
YHXB matbuot kotibi Zoyir Yo‘ldoshovning bildirishicha, 25-may kuni ertalab soat 07:00 dan 14:00 gacha olib borilgan nazorat tadbirlari davomida bir qator o‘quvchilar maktablarga avtomobil boshqarib kelgani qayd etilgan.
Qayd etilishicha, targ‘ibot va ogohlantirish ishlari olib borilganiga qaramasdan, o‘quvchilarning ota-onasiga tegishli yoki ijaraga olingan avtomashinalarni boshqarib kelish holatlari kuzatilgan. Aniqlangan qoidabuzarlar orasida 11- va 9-sinf o‘quvchilari bilan bir qatorda hatto 8-sinf o‘quvchilari ham bo‘lgani ma’lum qilingan.
Shuningdek, Xorazm viloyatida bitiruv tadbiriga avtomobil boshqarib kelgan qizlar ham aniqlangani bildirilgan.
“Bayram tadbirlarini ko‘ngilsiz hodisalarsiz o‘tkazish maqsadida minglab yo‘l-patrul xizmati hamda ichki ishlar organlari xodimlari maktablar atrofida kuchaytirilgan tartibda xizmat olib bormoqda”, deyiladi YHXB axborotida.
Mas’ullar ota-onalarni farzandlari hayoti va xavfsizligiga befarq bo‘lmaslikka, voyaga yetmaganlarning avtomobil boshqarishiga yo‘l qo‘ymaslikka chaqirdi. Nazorat tadbirlari davom etayotgani ma’lum qilindi.
