Yaponiyada noqonuniy migrantlar ijtimoiy tarmoqlar orqali nazorat qilinadi

 

Yaponiya hukumati noqonuniy immigratsiyaga qarshi nazorat choralarini kuchaytirmoqda. South China Morning Post (SCMP) nashri xabariga ko‘ra, mamlakat Immigratsiya xizmati kelgusi yilga qadar ijtimoiy tarmoqlar va onlayn platformalarni monitoring qiluvchi maxsus bo‘linma tashkil etishni rejalashtirmoqda.

Ma’lum qilinishicha, yangi tuzilma noqonuniy mehnat faoliyati bilan shug‘ullanayotgan xorijliklar, shuningdek vizasi muddati o‘tib ketgan holda mamlakatda qolayotgan shaxslar haqida ma’lumot to‘plash bilan shug‘ullanadi.

Rasmiylar, ayniqsa, amaldagi hujjatlarsiz ishlayotgan migrantlarni yollayotgan ish beruvchilarga qarshi kurashishga alohida e’tibor qaratmoqda. Shu maqsadda xorijiy tillardagi ish e’lonlari va noqonuniy bandlikka oid ma’lumotlarni aniqlash uchun zamonaviy tahliliy vositalardan foydalanilishi rejalashtirilgan.

SCMP ma’lumotiga ko‘ra, Tokio shimoli-sharqidagi Ibaraki prefekturasida noqonuniy immigrantlarni ishga yollagan kompaniyalar haqida xabar bergan shaxslarni rag‘batlantirish dasturi ham ishga tushirilgan. Agar murojaat asosida qonunbuzarlik aniqlansa, fuqarolarga 10 ming iyen miqdorida mukofot beriladi.

Qayd etilishicha, Yaponiya iqtisodiyotida ishchi kuchi tanqisligi kuzatilayotgani sababli xorijiy ishchilarga ehtiyoj ortib bormoqda. Hukumat statistikalariga ko‘ra, mamlakatda qonuniy faoliyat yuritayotgan xorijliklar soni 2025-yilda 2,57 million kishiga yetgan bo‘lib, bu avvalgi yilga nisbatan 11,7 foizga ko‘pdir.

Shuningdek, Yaponiyaga sayyohlik oqimi ham oshib bormoqda. Yaponiya Milliy turizm tashkiloti ma’lumotlariga ko‘ra, 2025-yilda Rossiyadan kelgan sayyohlar soni qariyb 195 ming kishiga yetgan.