Mycoal.uz'dan ko‘mir xarid qilgan ehtiyojmand oilalarga 600 ming so‘mgacha yordam ajratiladi

Ijtimoiy himoyaga muhtoj oilalarni qo‘llab-quvvatlash maqsadida Mycoal.uz portali orqali ko‘mir xarid qilgan “Ijtimoiy reyestr”ga kiritilgan oilalarga joriy yilning iyun–dekabr oylarida 600 ming so‘mgacha bir martalik moddiy yordam ajratilishi ma’lum qilindi.

 

Import qilinadigan ko‘mir sifati va ekologik xavfsizligi bo‘yicha yangi talablar joriy etilishi rejalashtirilmoqda. Unga ko‘ra, respublika hududiga olib kiriladigan ko‘mirning oltingugurt miqdori, kaloriyasi va boshqa ko‘rsatkichlariga talablar ishlab chiqiladi. Belgilangan standartlarga javob bermaydigan import ko‘mirdan foydalanish va uni sotish taqiqlanadi. Kelgusida ko‘mir importi faqat temir yo‘l orqali amalga oshirilishi ko‘zda tutilgan.

 

Taqdimotda Nishbosh ko‘mir konini o‘zlashtirish loyihasi haqida ham axborot berildi. Loyihaning umumiy zaxirasi 233 million tonna bo‘lib, yillik qazib chiqarish quvvati 10 million tonnani tashkil etadi. Qiymati 494 million dollarlik loyiha doirasida 880 ta yangi ish o‘rni yaratilishi rejalashtirilgan.

 

Bundan tashqari, ushbu kon negizida umumiy quvvati 1,4 gigavatt bo‘lgan yangi issiqlik elektr stansiyasini qurish taklif qilindi. Loyihaga ko‘ra, 1,3 milliard dollar investitsiya jalb etilib, har biri 350 megavatt quvvatga ega 4 ta energoblok ultra yuqori kritik texnologiyalar asosida bunyod etiladi.

 

Qurilish davrida 1,5 mingta, loyiha to‘liq ishga tushgach esa 310 ta yangi ish o‘rni yaratilishi kutilmoqda. Stansiya yiliga o‘rtacha 9,8 milliard kilovatt-soat elektr energiyasi ishlab chiqarishi va 2 milliard kub metr tabiiy gazni tejash imkonini berishi qayd etildi.

 

Shuningdek, taqdimotda tog‘-kon sanoatida mahalliylashtirish va sanoat kooperatsiyasini rivojlantirish masalalari ham muhokama qilindi. Tahlillarga ko‘ra, ushbu yo‘nalishda import o‘rnini bosish salohiyatini 2,1 milliard dollargacha yetkazish imkoniyati mavjud. Bu texnika, ehtiyot qismlar, kimyoviy reagentlar va yirik agregatlar ishlab chiqarishni mahalliylashtirish hisobiga amalga oshirilishi mumkinligi bildirildi.

 

Shu munosabat bilan 2027–2030-yillarga mo‘ljallangan tog‘-kon sanoatida mahalliylashtirish strategiyasini ishlab chiqish topshirildi. Yakunda davlat rahbari bildirilgan takliflarni ma’qullab, mutasaddilarga tegishli topshiriqlar berdi.