Toshkentdagi maktabda o‘quvchini urgan o‘qituvchiga oid jinoyat ishi tugatildi
IIV holat yuzasidan qo‘shimcha rasmiy ma’lumot taqdim etilishini bildirdi.
Toshkent shahrining Mirzo Ulug‘bek tumanidagi 275-sonli maktabda yuz bergan mojaro yuzasidan o‘qituvchiga nisbatan qo‘zg‘atilgan jinoyat ishi bo‘yicha tergov harakatlari yakunlandi. Bu haqda Ichki ishlar vazirligi matbuot kotibi Shohruh G‘iyosov ma’lum qildi.
Qayd etilishicha, voqea joriy yilning 19-may kuni sodir bo‘lgan. Maktabning informatika fani o‘qituvchisi hamda 9-sinf o‘quvchisi o‘rtasida dars jarayonida tortishuv kelib chiqqan. Dastlabki ma’lumotlarga ko‘ra, o‘quvchi o‘qituvchi tomonidan berilgan ko‘rsatmalarni bajarmagan hamda dars jarayoniga xalaqit bergan. Shundan so‘ng ular o‘rtasida janjal yuzaga kelgan.
Mazkur holat yuzasidan Mirzo Ulug‘bek tumani IIO FMB huzuridagi Tergov bo‘limi tomonidan o‘qituvchiga nisbatan Jinoyat kodeksining 105-moddasi — “Qasddan badanga o‘rtacha og‘ir shikast yetkazish” moddasi bilan jinoyat ishi qo‘zg‘atilgan edi.
25-may kuni esa ushbu jinoyat ishi bo‘yicha tergov harakatlari yakunlangani ma’lum qilindi. Ichki ishlar vazirligi holat yuzasidan yaqin kunlarda qo‘shimcha rasmiy ma’lumot taqdim etilishini bildirdi.
