Turkiyadan buvisi tomonidan tazyiqqa uchragan 3 nafar bola O‘zbekistonga qaytarildi
Bolalar ta’lim jarayonidan ajratilib, ularga faqat diniy ta’lim berilgan.
O'zbekistonning Istanbuldagi Bosh konsulxonasining ma’lum qilishicha, 12, 10 va 9 yoshli bolalar muntazam ravishda buvisi tomonidan jismoniy, ruhiy hamda ma’naviy tazyiqlarga duchor bo‘lib kelgan. Shuningdek, ular O‘zbekistondagi majburiy ta’lim jarayonidan ajratilib, Turkiyaga olib ketilgani, biroq u yerda ham hech bir ta’lim muassasasiga joylashtirilmagani aniqlangan. Bolalarning faqat diniy ta’lim olgani ma’lum bo‘lgan.
O‘rganishlar davomida bolalarning ota-onasi rasman ajrashgani, onasi esa Rossiyada istiqomat qilayotgani aniqlangan.
Mazkur holat yuzasidan voyaga yetmaganlar Bosh konsulxonaga olib kelinib, ular bilan psixolog ishtirokida suhbat o‘tkazilgan. Suhbat davomida bolalarning ruhiy holati, yashash sharoiti hamda keyingi taqdiri bilan bog‘liq masalalar atroflicha muhokama qilingan.
Shuningdek, O‘zbekistonning tegishli mutasaddi idoralari ishtirokida ishchi guruh tashkil etilib, voyaga yetmaganlarga vaqtincha vasiy tayinlash, ularni Vatanga qaytarish va ta’lim jarayoniga qayta jalb etish bo‘yicha zarur choralar ko‘rilgan.
25-may kuni 3 nafar voyaga yetmagan O‘zbekiston fuqarosi mas’ul xodim kuzatuvi ostida sog‘-salomat O‘zbekistonga qaytarilgan.
Hozirda bolalarni tegishli tashkilotlar tomonidan kutib olish, ularning ijtimoiy himoyasini ta’minlash, ta’limga qayta jalb etish hamda qonuniy manfaatlarini himoya qilish bo‘yicha tegishli ishlar olib borilmoqda.
