Saudiya Arabistoni hojilarga tibbiy yordam ko‘rsatishda dronlardan foydalanmoqda

Saudiya Arabistoni haj mavsumida hojilarga tibbiy xizmat ko‘rsatishda dronlardan foydalanmoqda. Bu haqda AFP agentligiga tayanib, Al-Monitor xabar berdi.

 

Ma’lum qilinishicha, Makka shahrida havo harorati 45 darajagacha ko‘tarilgani sababli issiq urishi bilan bog‘liq holatlar ko‘paygan. Shu bois mamlakat sog‘liqni saqlash xizmati tibbiy markazlarni zarur vositalar bilan tezkor ta’minlash uchun uchuvchisiz uchar qurilmalarni ishga solgan.

 

Dronlar Makka, Mino va Arafot hududlaridagi 127 ta klinikaga dori-darmon va boshqa tibbiy vositalarni yetkazib bermoqda. Saudiya rasmiylariga ko‘ra, ushbu tizim 1,5 milliondan ortiq hojilar to‘plangan gavjum yo‘llardagi tirbandlik muammosini kamaytirishga yordam bermoqda.

 

Milliy yagona xarid kompaniyasi (NUPCO) bosh operatsion direktori Fahd Al-Bathi AFP’ga bergan izohida haj mavsumidagi tibbiy ehtiyojlarga tayyorgarlik ishlari to‘qqiz oy avval boshlanganini aytdi.

 

Uning so‘zlariga ko‘ra, dronlar joriy etilishidan avval haydovchilar tibbiy vositalar kamayib qolgan klinikalarga yetib borish uchun ba’zan bir soatdan ortiq vaqt sarflardi.

 

Saudiya Arabistoni haj mavsumida boshqa zamonaviy texnologiyalarni ham qo‘llamoqda. 

 

Jumladan, Makka va uning atrofidagi minglab kuzatuv kameralaridan olingan tasvirlarni nazorat qilishda sun’iy intellektdan foydalanilmoqda.

 

Shuningdek, jazirama issiqka qarshi ulkan ventilyatorlar, bepul suv tarqatish punktlari va nam purkash tizimlari ishga tushirilgan.

 

Saudiya sog‘liqni saqlash tizimi vakili Jamil Abu Al-Aynaynning ta’kidlashicha, haj mavsumida issiqdan holsizlanish asosiy muammolardan biri hisoblanadi. Uning aytishicha, xizmatlar yuqori tayyorgarlik holatida faoliyat yuritmoqda.