Erdog‘an Netanyaxuni “zolim” deb atadi
Turkiya prezidenti musulmon dunyosi Netanyaxuga “tegishli saboq” berishini bildirdi.
Turkiya prezidenti Rejep Tayyip Erdog‘an Isroil bosh vaziri Binyamin Netanyaxuni G‘azo sektoridagi mojaro sabab keskin tanqid qildi. Bu haqda u Qurbon hayiti munosabati bilan xalqqa yo‘llagan murojaatida ma’lum qilgan, deb xabar berdi Anadolu.
Erdog‘an G‘azodagi vaziyat nafaqat Turkiya, balki butun musulmon dunyosining bayram kayfiyatiga salbiy ta’sir ko‘rsatayotganini ta’kidlagan.
“Netanyaxu nomi bilan tanilgan zolim butun musulmon dunyosidan tegishli saboq olishiga ishonaman”, — deya ta’kidlagan Turkiya rahbari.
Ma’lum qilinishicha, 2025-oktyabr oyida Isroil va HAMAS harakati o‘rtasida G‘azo sektorida sulhga erishilgan edi. Biroq tomonlar kelishuvning ikkinchi bosqichi yuzasidan hanuz murosaga kela olmayapti.
Ushbu bosqich HAMASni qurolsizlantirish va Isroil qo‘shinlarini anklav hududdan olib chiqishni nazarda tutadi. Shu bilan birga, Isroil bosh vaziri Binyamin Netanyaxu mamlakat G‘azo sektorining qariyb 60 foiz hududini nazorat qilayotganini bildirgan. 27-may kuni esa Isroil mudofaa kuchlari bir hafta avval HAMASning jangari qanoti rahbari yo‘q qilinganini ma’lum qilgan.
