Jo Bayden shaxsiy audioyozuvlar tarqalishini to‘xtatish uchun Adliya vazirligini sudga berdi
AQSh sobiq prezidenti tomoni bu materiallarning Kongress va ayrim tashkilotlarga berilishi uning shaxsiy hayotiga daxl qilishini bildirmoqda.
AQSHning sobiq prezidenti Jo Bayden maxfiy hujjatlar bilan bog‘liq tergov doirasida olingan audioyozuvlar va stenogrammalar oshkor qilinishining oldini olish maqsadida Adliya vazirligini sudga berdi. Bu haqda AP xabar berdi.
Ma’lum qilinishicha Vashington federal sudiga kiritilgan da’vo arizasida Bayden tarafi vazirlik ushbu materiallarni Kongress hamda konservativ “Heritage Foundation” tashkilotiga taqdim etishni rejalashtirayotganini bildirgan. Advokatlarga ko‘ra, bu Baydenning shaxsiy hayotiga asossiz aralashuv hisoblanadi.
Sud ishi Baydenning 2016–2017-yillarda yozuvchi Mark Zvonitser bilan uyida o‘tkazgan suhbatlari audioyozuvlari va stenogrammalariga taalluqli. Zvonitser sobiq prezidentning memuarlari ustida ishlagan. Keyinchalik ushbu materiallar Baydenning maxfiy hujjatlarni saqlashi yuzasidan maxsus prokuror Robert Hur olib borgan tergovda o‘rganilgan.
Baydenning huquqshunoslari “har bir amerikalik, jumladan amaldagi yoki sobiq vitse-prezident ham shaxsiy suhbatlari daxlsizligiga ega” ekanini ta’kidladi. Ularning fikricha, Adliya vazirligi jinoiy tergov davomida qo‘lga kiritilgan bunday ma’lumotlarni himoya qilish majburiyatiga ega.
Robert Hur boshchiligidagi bir yillik tergov yakunida tayyorlangan 345 betlik hisobotda Baydenning yoshi va xotirasi bilan bog‘liq savollar tilga olingan bo‘lsa-da, unga nisbatan jinoiy ayblov qo‘yilmagan. Maxsus prokuror sudda ayblovni isbotlash uchun yetarli dalil topilmaganini bildirgan.
Bayden avval ham Hur bilan bo‘lgan suhbat audioyozuvlari e’lon qilinishiga qarshi chiqqan edi. 2024-yilda Vakillar palatasi bosh prokuror Merrik Garlandni Kongressga hurmatsizlikda ayblash uchun ovoz bergan. Bunga Oq uy ijro hokimiyati imtiyozidan foydalanib, audioyozuvlarni Kongressga taqdim etmagani sabab bo‘lgan.
Shu bilan birga, federal prokurorlar bilan o‘tkazilgan besh soatlik suhbat stenogrammalari ommaga e’lon qilingan edi. Ularda Bayden ayrim sanalar va tafsilotlarni aniq eslay olmagani qayd etilgan.
Respublikachilar Bayden o‘zining Adliya vazirligi tomonidan himoya qilinayotganini ta’kidlab kelmoqda. Demokratlar esa sobiq prezident tergov bilan hamkorlik qilganini urg‘ulab, bu holatni Donald Trampga qarshi maxfiy hujjatlar bo‘yicha olib borilgan alohida jinoiy ish bilan solishtirmoqda.
