1-sentabrdan filmlar reklamasi uchun budjetning 30 foizigacha mablag‘ beriladi
Davlat buyurtmasi asosidagi filmlar daromadining 50 foizi prodyuser va ijodiy jamoalarga rag‘bat sifatida beriladi.
Prezident Shavkat Mirziyoyevning madaniyat va san’at sohasi vakillari bilan uchrashuvida kino sanoatini rivojlantirish va boshqaruv tizimini takomillashtirishga qaratilgan qator yangi tashabbuslar e’lon qilindi.
Qayd etilishicha, joriy yilning 1-sentabridan boshlab davlat buyurtmasi asosida yaratiladigan filmlarning targ‘ibot va reklama xarajatlari uchun loyiha budjetining 30 foizigacha mablag‘ ajratiladi. Shuningdek, bunday loyihalar bo‘yicha xarid shartnomalarini ekspertizadan o‘tkazish talabi bekor qilinadi.
Yangi tartibga ko‘ra, xorijiy kompaniyalarning O‘zbekiston hududida kino mahsulotlari yaratish bilan bog‘liq faoliyati soliqlardan ozod etiladi.
Davlat buyurtmasi asosida suratga olingan filmlar namoyishidan tushgan mablag‘ning 50 foizi prodyuserlar va ijodiy jamoalarga qo‘shimcha rag‘bat sifatida yo‘naltiriladi.
Shuningdek, O‘zbekiston kinoarboblari ijodiy uyushmasi tomonidan o‘tkaziladigan “Oltin humo” milliy kino taqdimotining nufuzini oshirish maqsadida har yili 5 milliard so‘m mablag‘ ajratilishi belgilandi.
Uchrashuvda Respublika kinematografiya komissiyasi hamda Milliy va Badiiy kengashlar faoliyati tanqid qilinib, ularning eskicha boshqaruv va samarasiz nazorat tizimidan voz kecha olmagani qayd etildi. Shu munosabat bilan mazkur komissiya va kengashlar faoliyatini tugatish taklifi ilgari surildi.
Endilikda kino janri va mavzusidan kelib chiqib, tegishli yo‘nalish mutaxassislaridan iborat haq to‘lanadigan ekspert guruhlari shakllantiriladi. Ushbu guruhlar tarkibiga O‘zbekiston kinoarboblari ijodiy uyushmasi, Yozuvchilar uyushmasi va Bastakorlar uyushmasi tavsiya etgan mutaxassislar kiritiladi.
Mutasaddilarga kino sohasida zamonaviy, ochiq va shaffof boshqaruv tizimini joriy etish bo‘yicha takliflar ishlab chiqish topshirildi.
