Har yili 1 ming nafar ijodkorga ipoteka krediti dastlabki to'lovining 50 foizi qoplab beriladi
Toshkentda faoliyat yuritayotgan ijodkorlarga oyiga 2,5 mln so‘mgacha, viloyatlarda esa 1,6 mln so‘mgacha ijara kompensatsiyasi to‘lanadi.
Prezident Shavkat Mirziyoyevning madaniyat va san’at sohasi vakillari bilan uchrashuvida adabiyot, madaniyat va san’at xodimlarini qo‘llab-quvvatlashga qaratilgan qator yangi tashabbuslar e’lon qilindi.
Qayd etilishicha, shoir va yozuvchilar uchun munosib ijodiy muhit yaratish maqsadida yiliga kamida 50 ta eng sara asarga ijodiy buyurtma beriladi. Shuningdek, har yili o‘zbek adabiyotining eng yaxshi 10 ta asari xorijiy tillarga tarjima qilinib, mualliflar ishtirokida chet davlatlarda taqdimotlari tashkil etiladi.
Yangi tartibga ko‘ra, O‘zbekiston Yozuvchilar uyushmasi tavsiyasi asosida chop etiladigan kitoblarning qog‘oz xarajatlari davlat tomonidan qoplanadi.
Uchrashuvda yosh iste’dodlarning she’riyat va san’atni uyg‘unlashtirgan she’riy konsertlar tashkil etish tashabbuslari ham qo‘llab-quvvatlandi. Ushbu yo‘nalishdagi eng sara 100 ta loyiha davlat mablag‘lari hisobidan moliyalashtiriladi.
Shuningdek, har bir viloyatda yil yakuniga qadar chekka va olis hududlardagi 50 tadan 100 tagacha mahallada namunali kutubxona va kitob do‘konlari tashkil etiladi.
Ijodkorlarni ijtimoiy qo‘llab-quvvatlash maqsadida har yili 1 ming nafar shoir va yozuvchi, madaniyat va san’at vakili, muzey xodimi hamda rassomlarga uy-joy olish uchun ipoteka kreditining dastlabki badalining 50 foizi qoplab beriladi.
Bundan tashqari, boshqa hududdan kelib ishlayotgan soha vakillariga uy-joy ijarasi xarajatlari uchun Toshkent shahrida oyiga 2,5 million so‘mgacha, viloyatlarda esa 1,6 million so‘mgacha kompensatsiya to‘lanadi.
Yangi tizimga muvofiq, har yili faoliyatida yuqori natijalarga erishgan 1 ming nafar soha xodimi davlat tibbiy sug‘urta jamg‘armasi hisobidan bepul davolanadi. Yana 2 ming nafar ijodkorga tibbiy sug‘urta paketi taqdim etiladi. Kamida 10 yil ishlagan xodimlarga esa sanatoriylarga bepul yo‘llanmalar beriladi.
Shuningdek, 15-iyundan boshlab xalq artisti, xalq shoiri va xalq yozuvchisi kabi yuksak faxriy unvonlarga ega ijodkorlarning aeroport va vokzallardagi VIP zallardan bepul foydalanishi ta’minlanadi.
