Madaniyat va san’at sohasida 21 ta ijodiy birlashma tashkil etiladi

 

Prezident Shavkat Mirziyoyevning madaniyat va san’at sohasi xodimlari bilan uchrashuvi bo‘lib o‘tdi.

 

Tadbirda milliy adabiyot, madaniyat va san’atning taniqli vakillari — shoir va yozuvchilar, aktyorlar, dramaturglar, rejissyorlar, xonandalar, sozandalar, kompozitorlar, rassomlar, haykaltaroshlar, hunarmandlar hamda san’atshunos olimlar ishtirok etdi.

 

Uchrashuvda iste’dodlarni aniqlash va qo‘llab-quvvatlashning yangi tizimi joriy etilishi ma’lum qilindi. Xususan, teatr, kino, raqs, opera, folklor, estrada, akademik va milliy cholg‘u san’ati, tasviriy hamda amaliy san’at kabi 21 ta yo‘nalish bo‘yicha ijodiy birlashmalar tashkil etiladi.

 

Mazkur birlashmalarga tajribali ijodkorlar bilan bir qatorda vazirlar va yirik kompaniyalar rahbarlari ham hamrais sifatida biriktiriladi. Ular hududlardagi musiqa maktablari, madaniyat markazlari va badiiy jamoalar faoliyatini qo‘llab-quvvatlash, mavjud muammolarni hal etish hamda yosh iste’dodlarni rag‘batlantirish bilan shug‘ullanadi.

 

Shuningdek, har bir ijodiy yo‘nalish kesimida mahalla, tuman, viloyat va respublika bosqichlarida tanlovlar tashkil etilishi rejalashtirilgan. G‘olib va sovrindorlarning gastrol safarlari, festival va xalqaro tanlovlarda ishtirok etishiga ko‘mak beriladi.

 

Har yili “Milliy ijodkorlar qurultoyi” o‘tkaziladi. Unda 21 ta ijodiy birlashmaning eng faol va yuqori natijalarga erishgan vakillari taqdirlanadi.

 

G‘oliblarga bir yil davomida har oy 5 million so‘m qalam haqi to‘lanadi, ular mamlakat bo‘ylab samolyot, poyezd va jamoat transportidan bepul foydalanish, ixtisoslashgan tibbiyot markazlarida bepul davolanish imkoniyatiga ega bo‘ladi.

 

Ular uchun mahorat maktablari va ijod uylari tashkil etiladi. Prezident sovrindorlar keyingi yillarda ham yangi ijodiy yutuqlarga erishsa, mazkur imtiyozlarni saqlab qolish taklifini qo‘llab-quvvatladi.