Namanganda 23 yoshli yigit soyda cho‘kib ketdi
U cho'milish uchun soyga tushgan va suv yuzasiga qaytib chiqmagan
Namangan viloyatining Pop tumanida 23 yoshli yigit suvga cho‘kib ketdi. Bu haqda Hayot Shamshutdinov malum qildi.
Ma’lum qilinishicha, joriy yilning 28-may kuni yigit qarindoshlari bilan birgalikda Pop tumanidagi dam olish maskanlaridan biriga borgan. U maskan hududidan oqib o‘tuvchi Cho‘daksoy soyiga cho‘milish maqsadida tushgan. Dastlabki ma’lumotlarga ko‘ra, ehtiyotsizlik oqibatida yigit suvda cho‘kib ketgan va qayta suv yuzasiga chiqmagan.
Mazkur holat yuzasidan Pop tumani prokuraturasi tomonidan tergovga qadar tekshiruv harakatlari olib borilmoqda.
Shuningdek, tekshiruv doirasida tuman Favqulodda vaziyatlar bo‘limi qutqaruvchilari jalb etilgan holda suvga cho‘kib ketgan yigitni qidirish ishlari davom ettirilmoqda.
