Oliygohlarda dars beradigan taniqli ijodkorlarga 50 foizgacha ustama to‘lanadi
Talabalar startaplari uchun 10 ta oliygohga 50 milliard so‘m ajratiladi.
Prezident Shavkat Mirziyoyevning madaniyat va san’at sohasi vakillari bilan uchrashuvida oliy ta’lim tizimini takomillashtirish, ijodiy yoshlarni qo‘llab-quvvatlash va sohada zamonaviy ta’lim mexanizmlarini joriy etishga qaratilgan yangi tashabbuslar ilgari surildi.
Qayd etilishicha, madaniyat va san’at yo‘nalishidagi 10 ta oliygoh rektorlari har bir talaba bilan individual ishlash, ularning shaxsiy brendini shakllantirish, ijodiy mahsulotlarini tijoratlashtirish hamda hamkorlik imkoniyatlarini kengaytirishga alohida e’tibor qaratishi zarur.
Yangi o‘quv yilidan boshlab har bir talabaga taniqli ijodkorlar biriktirilib, dual ta’lim tizimi yo‘lga qo‘yiladi. Ushbu tizim doirasida ustoz ijodkorlar talabalarning konsert, teatr va boshqa sahna chiqishlarida ishtirokini ta’minlab, ularni amaliy tajriba asosida tayyorlab boradi.
Bunda ustoz ijodkorlarga oliygoh professor-o‘qituvchilari bilan teng miqdorda haq to‘lanadi. Oliygohlarda dars beradigan taniqli ijodkorlarga esa qo‘shimcha 50 foiz ustama belgilanishi rejalashtirilmoqda.
Ta’lim dasturlariga “Art-menejment”, “Kreativ industriya”, “Loyihalarni tijoratlashtirish” kabi zamonaviy fanlar kiritiladi. Shuningdek, kinoindustriya, moda va dizayn, madaniyat menejmenti yo‘nalishlarida xorijdan 50 nafar tajribali mutaxassis jalb etiladi.
Talabalarning startap loyihalarini qo‘llab-quvvatlash maqsadida 10 ta oliygohga jami 50 milliard so‘m mablag‘ ajratiladi.
Shuningdek, Konservatoriya huzuridagi markaz hamda San’at va madaniyat instituti tarkibidagi markazlar negizida Madaniyat vazirligi tizimida soha xodimlarining malakasini oshirish va qayta tayyorlash instituti tashkil etiladi.
