Rossiyada 5 yoshli qizni zo'rlamoqchi bo'lgan pedofilni bolalar to'xtatib qoldi
44 yoshli erkak sudda aybini tan olib, o‘ziga nisbatan uy qamog‘i qo‘llanishini so‘ragan.
Rossiyaning Tyumen shahrida 5 yoshli qizga nisbatan jinsiy zo‘ravonlik harakatlarini sodir etishga uringanlikda ayblanayotgan 44 yoshli erkak sud qarori bilan hibsga olindi. Bu haqda REN TV xabar berdi.
Tergov ma’lumotlariga ko‘ra, hodisa 28-may kuni sodir bo‘lgan. Gumonlanuvchi qizaloqni kuch ishlatib ko‘p qavatli uy kirish yo‘lagiga olib kirgan va unga nisbatan jinsiy xarakterdagi zo‘ravonlik harakatlarini sodir etishga uringan.
Viloyat sudlari qo‘shma matbuot xizmatining ma’lum qilishicha, erkakka Rossiya Jinoyat kodeksining voyaga yetmagan shaxsga nisbatan jinsiy daxlsizlikka qarshi jinoyatlarni nazarda tutuvchi moddasi bo‘yicha ayblov e’lon qilingan. Sud uning ehtiyot chorasi sifatida 28-iyulgacha tergov hibsxonasida saqlanishi haqida qaror chiqargan.
Qayd etilishicha, erkak sud majlisida aybini tan olib, qilmishidan pushaymon ekanini bildirgan hamda uy qamog‘ini qo‘llashni so‘ragan.
Erkakning jinoiy harakatlari ikki nafar o‘smirning hushyorligi tufayli to‘xtatilgan. Voqeani payqagan bolalar yaqin atrofdagi ayolni yordamga chaqirgan. Ayol darhol voqea joyiga yetib borib, qizaloqni qutqarib qolgan.
Hodisa yuzasidan jinoyat ishi qo‘zg‘atilgan, tergov harakatlari davom etmoqda.
