Saida Mirziyoyeva BMTning Giyohvand moddalar va jinoyatchilik bo‘yicha boshqarmasi rahbari bilan uchrashdi
Tomonlar ayollar, bolalar va yoshlarni himoya qilishga qaratilgan tadbirlar yuzasidan ham fikr almashdi.
Venada O‘zbekiston Prezidenti administratsiyasi rahbari Saida Mirziyoyeva BMT Bosh kotibi o‘rinbosari va BMTning Giyohvand moddalar va jinoyatchilik bo‘yicha boshqarmasi (BMT GJB) ijrochi direktori etib yangi tayinlangan Monika Juma bilan uchrashuv o‘tkazdi.
Saida Mirziyoyevaning ma’lum qilishicha, muzokaralar chog‘ida O‘zbekistonning BMT GJB bilan hamkorligi, giyohvandlik tahdidlariga qarshi kurashish masalalari hamda 2026-yil aprel oyida Samarqand shahrida ushbu global muammoga bag‘ishlab o‘tkazilgan xalqaro forum yakunlari va undan keyingi amaliy ishlar muhokama qilingan.
Shuningdek, tomonlar ayollar, bolalar va yoshlarni himoya qilishga qaratilgan tadbirlar yuzasidan ham fikr almashgan. Saida Mirziyoyeva Monika Jumaga O‘zbekiston tomonidan BMT Jinoyatchilikning oldini olish komissiyasining 35-sessiyasi doirasida tashkil etilgan maxsus tadbirni qo‘llab-quvvatlagani uchun minnatdorlik bildirgan.
“Biz BMT GJB bilan xavfsizlik, adolat va barqaror taraqqiyot borasida sheriklikni yanada rivojlantirishga tayyormiz”, deya yozdi Mirziyoyeva.
