Saida Mirziyoyeva Vena shahrida BMT sessiyasida milliy ma’ruza bilan ishtirok etdi
Mirziyoyeva kiberjinoyatchilik, korrupsiya va oilaviy zo‘ravonlik chegara bilmasligini ularga qarshi xalqaro hamkorlik orqali kurashish zarurligini ta’kidladi.
Avstriyaning Vena shahrida BMTning Jinoyatchilikning oldini olish va jinoiy odil sudlov komissiyasining 35-sessiyasi bo‘lib o‘tdi. Unda dunyoning 175 davlatidan 1,5 mingdan ortiq yuqori martabali rahbar va ekspertlar ishtirok etdi. Bu haqda Saida Mirziyoyeva xabar berdi.
Sessiya doirasida Saida Mirziyoyeva milliy ma’ruza bilan so‘zga chiqdi. Prezidenti administratsiyasi rahbari o‘z nutqida O‘zbekistonda odil sudlovni ta’minlash, ayollar va bolalar huquqlarini himoya qilish, jinoyatchilik profilaktikasi hamda yoshlarni qo‘llab-quvvatlash yo‘nalishlarida amalga oshirilayotgan islohotlar haqida ma’lumot berdi.
Saida Mirziyoyevaning ta’kidlashicha, kiberjinoyatchilik, korrupsiya va oilaviy zo‘ravonlik kabi tahdidlar davlat chegaralarini tan olmaydi. Shu bois ularga qarshi kurashishda ochiq muloqot, tajriba almashish va xalqaro hamkorlikni kuchaytirish muhim ahamiyat kasb etadi.
Qayd etilishicha, O‘zbekiston joriy yilda ilk bor BMTning mazkur nufuzli tuzilmasiga a’zo bo‘ldi.
