Toshkentda elektr podstansiyasi yonib ketdi
Hodisa oqibatida Shayxontohur va Olmazor tumanining ayrim hududlarida elektr ta’minotida uzilishlar kuzatilmoqda.
Toshkent shahrining Olmazor tumanida joylashgan elektr podstansiyasi portlagani haqida xabarlar tarqaldi. Holat yuzasidan Toshkent shahar FVB rasmiy ma’lumot berdi.
Ma’lum qilinishicha, 1-iyun kuni soat 18:57 da Olmazor tumani Kichik halqa yo‘li ko‘chasida joylashgan podstansiya hududida transformator yonayotgani haqida xabar kelib tushgan.
Shundan so‘ng yong‘in-qutqaruv ekipajlari voqea joyiga soat 19:01 da yetib borgan. Yong‘in soat 19:12 da qurshab olinib, 19:17 da to‘liq o‘chirilgan.
Dastlabki ma’lumotlarga ko‘ra, hodisa oqibatida tan jarohati olganlar yo‘q. Vaziyat Toshkent shahar Favqulodda vaziyatlar boshqarmasi tomonidan nazoratga olingan.
“O‘zbekiston milliy elektr tarmoqlari" AJga ko‘ra, 110 kV kuchlanishli "Vistovochnaya" podstamsiyasida mazkur nosozlik sababli ushbu energetika obyektidan chiquvchi 6 kV qurilmalarga ulangan tarmoqlar kuchlanishsiz qolgan.
Natijada Shayxontohur va Olmazor tumanining ayrim hududlari iste’molchilarida elektr ta’minotida uzilishlar kuzatilmoqda.
Maxsus brigada nosozlik sababini aniqlash va uni bartaraf etish ishlari bilan shug‘ullanmoqda.
